היינט דאנערשטאג איז ערווארטעט זיך אנצוהייבן די היי יעריגע זוממער סעזאן ביי טויזענטער היימישע אידן לענגאויס ניו יארק, ווען מאסן אידישע משפחות וועלן זיך ארויסלאזן אויף די וועגן און שטעגן צו די הויכע קעטסקיל בערג, וואו מען וועט פארברענגען א געשמאקע זוממער מיטן אויבערשטנס הילף.
ווי יאר יערליך ווערט אהערגעשטעלט די באקאנטע "מנחה עריע – תפילת מרדכי", ע"ש דער אומפארגעסליכער עסקן הרב מרדכי פריעדמאן ע"ה, בנדבתו ובהשתדלותו פון זיין זון הנגיד העסקן ר' אברהם יעקב פריעדמאן הי"ו, ווי עס ווערט דעזיגנירט א ספעציעלע ארט אינמיטן די וועג ארויף פון די שטאט צו די קאנטרי, און איז אקטיוו וועכנטליך יעדן דאנערשטאג אין די שפעטע נאכמיטאג שעות, אז אידישע קינדער זאלן זיך קענען אפשטעלן אינמיטן די וועג, דאווענען מנחה און זיך דערכאפן דאס הארץ.
צוליב די אנגייענדע בוי ארבעט ביים אפיציעלן מנחה עריע אין סלאטסבורג, איז היי יאר געווארן דעזיגנירט א נייע ארט פאר די מנחה עריע, ביי די באקאנטע ספרינג וואלי מארקעט פלעיס, דארט וואו עס געפונט זיך די בינגא סופערמארקעט אין מאנסי, און געפונט זיך על אם הדרך, ממש ביי די עקזיט פון די ניו יארק סטעיט טרואוועי, צווישן די פאליסעידס און די גארדען סטעיט פארקוועי.
דארט אויפן ריזן פארקינג לאט ווערט אויפגעשטעלט א גרויסע לופטיגע שאטער, און דערנעבן ווערט דעזיגנירט ספעציעלע פארקינג ערטער, די דערנעבענדיגע געשעפטן האבן געמאלדן אז זיי וועלן זיין אפן ספעציעל שפעטע שעות פאר די פילע מתפללים צו קענען איינקויפן. דערצו האבן צוגעהאלפן א רייע עסקנים און שתדלנים, די וואוילטעטיגע חברים ד'ראקלענד ארגענעזאציע, אין שפיץ פון ר' יוסף מארגערעטן הי"ו, ר' יוחנן פליישמאן הי"ו, און ר' הערשל מארגערעטן הי"ו.
