שטייענדיג בלויז דריי וואכן זינט די היסטארישע נסיעה וואס די גדולי הדור בארץ הקודש האבן אונטערגענומען בטירחא דגופא ובטירחא דגברא רבא ארויסצופארן קיין אמעריקע אויפצוטרייבן פאנטאסטישע סכומים לטובת די ניי געגרינדעטע קרן עולם התורה אין ליכט פון די גזירת הגיוס, איז נארוואס באשטעטיגט געווארן אז די גדולי הדור וועלן ווידער ארויספארן קיין חוץ לארץ פאר דעם הייליגן צוועק, דאסמאל קיין אייראפע מזכה צו זיין יהדות ענגלאנד מיט די גרויסע זכיה צו שטיין צוהילף פאר די עולם התורה.
די היסטארישע נסיעה איז ערווארטעט צוזאמצוברענגען זעקס גדולי הדור און מעגליך מער, די פינף גדולים וואס זענען ארויסגעפארן קיין אמעריקע מיט עטליכע וואכן צוריק, מרנן ורבנן ראשי ישיבת סלאבאדקע הגאון הגדול רבי דוב לאנדא שליט"א, און הגאון הגדול רבי משה הלל הירש שליט"א. הגאון המשגיח רבי דן סגל שליט"א, הגאון רבי יעקב הלל שליט"א ראש ישיבת המקובלים אהבת שלום, און כ"ק אדמו"ר מראחמיסטריווקא שליט"א. און צוזאמען מיט זיי וועט דאסמאל אויך מיטפארן הגאון הגדול רבי דוד כהן שליט"א ראש ישיבת חברון.
די נסיעה וועט פארקומען קומענדיגן פרשת מטות מסעי, ווען צום הויכפונקט וועט פארקומען א ריזן מעמד קבלת פנים לכבודה של תורה בעיר הבירה לאנדאן דינסטאג נאכמיטאג, וואו טויזענטער אידן וועלן ארויסקומען באגריסן די גדולי התורה, און אפגעבן דעם ריכטיגן כבוד ווי עס פאסט, און דערביי אוועקשטעלן א יסוד איתן צו שאפן די פארבליבענע פופצן טויזענט פונט, צו קענען דעקן די פרישע יערליכע בודזשעט פון הונדערט און זיבן מיליאן דאללער, וואס האט זיך געשאפן אין ליכט פון די טרויעריג בארימטע גזירת גיוס בני הישיבות.
הגאון הגדול רבי אברהם גורוויץ שליט"א ראש ישיבת געיטסהעד, ומגדולי המנהיגים ביהדות ענגלאנד, האט אפגעשריבן א ספעציעלע מכתב קודש וואו ער טוט באגריסן די גדולי התורה, און ער ווארעמט אן תושבי ענגלאנד רבתי צו שטיין צוהילף פאר די מעכטיגע תורה אימפעריע די פריש געגרינדעטע "קרן עולם התורה".
