שטייענדיג אין סאמע ברען פון די מאסיווע פראיעקט אויפצוטרייבן צענדליגע מיליאנען להחזקת קרן עולם התורה, האבן די שרי התורה די גדולי הדור אפגעשיקט א ספעציעלע מכתב קודש צום ווייטן אסטראליע, וואו זיי ווענדן זיך צום ארטיגן אידנטום צו זיין א חלק אין היסטאריע פון כלל ישראל, און זיך אנשליסן אלס שותפים לדבר מצוה בהחזקת עולם התורה.
די מכתב קודש איז אונטערגעשריבן דורך די זעקס גדולי הדור וואס זענען ארויסגעפארן קיין אמעריקע פארלאפענעם חודש סיון צו גרינדן די קרן עולם התורה, מרנן ורבנן ראשי ישיבת סלאבאדקע, הגאון הגדול רבי דוב לאנדא, הגאון הגדול רבי משה הלל הירש, הגאון המשגיח רבי דן סגל, כ"ק אדמו"ר מראחמיסטריווקא שליט"א, הגאון הגדול רבי יעקב הלל ראש ישיבת אהבת שלום, און הגאון הגדול רבי אברהם סאלים שליט"א ראש ישיבת מאור התורה.
אינעם בריוו וואס איז געשיקט געווארן פארלאפענעם מיטוואך י"ח תמוז, שרייבן די גדולי הדור:
"לכבוד אחינו בני ישראל תושבי מדינת אסטראליע, ועל צבאם רבני קהילות הקודש שליט"א, נדיבי העם והעסקנים החשובים, וכלל שוחרי תורה ואוהביה".
די ישיבות און כוללים אין ארץ ישראל גייען אריבער אצינד א שווערע תקופה, די רעגירונג האט געשטעלט א נייע גזירה אפצוהאלטן שטיצע פון מוסדות התורה, און די ישיבות און כוללים - די נשמה פון כלל ישראל - מוטשענען זיך אנצוגיין, צוברענגענדיג אז א גרויס טייל פון די ישיבות און כוללים זענען אין געפאר פון פארשלאסן ווערן היל"ת.
ביז היינט פלעגט מען ערהאלטן 228 דאללער פאר יעדן אינגערמאן פער חודש, וואס באדייט א איינקונפט פון 2736 דאללער א יאר פער אינגערמאן, און איין און א האלב טויזענט דאללער א יאר פאר א בחור, דאס אלעס ברענגט צום סך הכל פון הונדערט און זיבן מיליאן דאללער וואס איז אצינד פארלוירן געווארן אין די פינאנציעלע בודזשעט פון די ישיבות און כוללים בארץ הקודש.
א גרויס טייל פון די סכום פון הונדערט און זיבן מיליאן איז שוין ב"ה געשאפן געווארן דורך נדיבים בעם, און אצינד נויטיגט מען זיך אין נאך דרייצן מיליאן דאללער צו געבן א שטופ אויף ווייטער, צו קענען ווייטער אנגיין צו מרביץ תורה זיין פאר תלמידים. דערביי בעט מען פון די נדיבי העם אין אסטראליע זיי זאלן אויך אנטקעגן קומען די נייע קרן מיט שיינע סכומים, אפילו מער פון וויפיל מען קען למען לומדי התורה, און אין דעם זכות וועט מען געבענטשט ווערן מיט אלע ברכות וואס איז צוגעזאגט פאר די תמכין דאורייתא, כי התורה כוללת כל הטובות שבעולם.
