דעם מאנטאג כ"ב אב איז נפטר געווארן אין ניו יארק הרבנית הישישה מרת מאטיל זאקס ע"ה, אלמנת הרה"ג ר' אברהם גרשון זאקס זצ"ל ראש ישיבת חפץ חיים מראדין אין מאנסי, אייניקל פון מרן הגה"ק בעל החפץ חיים זי"ע, אין טיפן עלטער פון פינף און ניינציג יאר.
די חשובע נפטרת איז געווען א טאכטער פון כ"ק אדמו"ר הרה"ק רבי חנוך העניך מסאסוב קרעצקי זצ"ל, און א שוועסטער פון כ"ק אדמו"ר בעל מנחת יו"ט מסאסוב סעמיהאלי זצ"ל. זי האט געצויגן א הערליכע יחוס צו צדיקי בית בעלזא, אלעסק, סאסוב, טשערנאביל, סאווראן, אפטא, ולמעלה בקודש, און געווען א שוועגערין פון הרה"ק בעל ברך משה מסאטמאר זי"ע פארן קריג.
וכבוד גדול עשו לה במותה, די לוויה איז פארגעקומען דעם דינסטאג אין היכל ישיבת חפץ חיים אין קרית ראדין אין מאנסי, נעכטן מיטוואך איז פארגעקומען די לוויה ביי ביהמ"ד הגדול ברך משה סאטמאר אויף רחוב חגי אין ירושלים, וואו עס האבן מספיד געווען די קרובי המשפחה, כ"ק אדמו"ר מסאסוב שליט"א, און זיין ברודער הגה"צ ר' משה טייטלבוים שליט"א דומ"ץ סאטמאר ירושלים.
