אין ליכט פון די שרעקליכע גזירת החינוך וואס הויערט אויף אחינו בני ישראל במדינת ענגלאנד, וואס רעכנט אריין די היימישע אידנטום אין לאנדאן, מאנטשעסטער, און נאך געגנטער, איז באשטימט געווארן דורך די גדולי הרבנים בעיר הבירה לאנדאן צו אפהאלטן א גרויסע יום תענית ותפילה, וואו מען וועט זיך צוזאמקומען און איינרייסן וועלטן להעביר את רוע הגזירה.
אין א בריוו וואס ערשיינט דורך בית דין צדק דהתאחדות קהילות החרדים, רופן די גדולי רבני העיר דעם גאנצן ציבור לזעוק ולהתריע להעביר את רוע הגזירה. די בריוו איז אונטערגעשריבן דורך די גדולי רבני העיר, הגה"צ ר' לייבוש פאדווא שליט"א אין נאמען פון זיין פאטער הגה"צ גאב"ד לאנדאן שליט"א, הגה"צ ר' שלום פריעדמאן שליט"א סגן אב"ד, הגה"צ ר' יוסף פאדווא שליט"א נשיא, הגה"צ ר' אהרן דוד דוננער שליט"א ראב"ד, הגה"צ ר' זאב פעלדמאן שליט"א רב דקהל תורה עץ חיים, הגה"צ ר' שלמה פרישוואסער שליט"א אב"ד סאסוב, הגה"צ ר' ישראל מאיר גרינבערג שליט"א, הגה"צ ר' מענדל גאליצקי שליט"א דומ"ץ בעלזא, און הגה"צ ר' יואל שטיין שליט"א דיין אין סאטמאר.
די יום תענית ותפילה איז באשטימט אויף קומענדיגן זונטאג פרשת בשלח, לסדר ויזעקו בני ישראל אל ה'. אין דעם טאג וועלן זיך צוזאמקומען טויזענטער איינוואוינער אין שטאט און צוזאמען מתפלל זיין מיט א כח הרבים, אריינגערעכנט די בחורי הישיבות, און תינוקות של בית רבן פון כתה ח' און העכער, די גרויסע עצרת תפילה וועט פארקומען אין די גיגאנטישע זאלן פון יסודי התורה, און אזוי אויך וועט ווערן איינגערישט די ארומיגע שטחים צו קענען ארייננעמען שווערע טויזענטער אידן.
אין דעם טאג פון זונטאג בשלח ד' שבט, וועלן אלע תושבי העיר פאסטן א האלבע טאג, און די עלטערע אידן און מלמדי תינוקות, וועלן אויסלייזן דעם תענית מיט צדקה ופדיון נפש.
