אין די צייט וואס די יהדות החרדית אין ארץ ישראל שטורעמט די לעצטע פאר וואכן איבער די שרעקליכע פארשארפערטע גזירה פון גיוס בני הישיבות, מיט נאכאנאנדע אסיפות און מחאות אדירות, איבערהויפט אין די לעצטע פאר טעג זינט עטליכע בני ישיבות זענען ארעסטירט געווארן פארן בלויזן חטא פון זיך נישט שטעלן אין מיליטער, גרייט מען זיך אין אמעריקע אנצופאנגען א מאסיווע מערכה צו שטיין אויף די רעכטע זייט פון אחינו בני ישראל בארץ הקודש.
טראץ וואס מען שטייט אין די זוממער וואכן ווען כלל ישראל איז פארשפרייט אין פארשידענע געגנטער, האט כ"ק אדמו"ר מסאטמאר שליט"א געלאזט הערן חוות דעת קדשו אז די וויכטיגקייט און נויט פון לאזן הערן א באלדיגע קול מחאה איז גאר שטארק, און מען מוז זאפארט פאררופן כאטש עפעס א מחאה צו פארזיכערן אז די יהדות הגולה שטייט פעלזן פעסט למען שלום אחינו היקרים, און צייגן קדם תבל ומלואה אז כלל ישראל וועט זיך נישט רירן פון די מסורה אויף קיין שום פאל.
אצינד איז באשטעטיגט געווארן אז קומענדיגן מאנטאג פרשת ראה וועט פארקומען א גרויסארטיגע מחאה אדירה, א מאסן פיקעטינג פארנט פון די ציוניסטישע קאנסולאט אין מאנהעטן, וואו טויזענטער אידן וועלן זיך פארזאמלען בפקורת הקודש פון כ"ק אדמו"ר מסאטמאר שליט"א אויסצושרייען דעם קול מחאה, און מתפלל זיין פאר די וואוילזיין פון אחינו בני ישראל בארץ הקודש הנתונים בצרה ובמצוקה.
טעטיגע עסקנים פון איבעראל זענען שוין אקטיוו אויסצוארבעטן די טעכנישע דעטאלן, מען איז שוין געזעסן מיט די פאליציי, און ערהאלטן די נויטיגע פערמיטן צו קענען אפהאלטן דעם עצרת, אזוי אויך מאכט מען זיכער מיט די אלגעמיינע מידיע ריזן אז די פראטעסט זאל געדעקט ווערן בכל רחבי העולם, עס זאל האבן די ריכטיגע אפקלאנג ולה' הישועה.
