נעכטן דינסטאג נאכמיטאג, בפרוס ההילולא קדישא פון כ"ק הרה"ק מסאטמאר זי"ע, איז כ"ק אדמו"ר מוויזניץ שליט"א פון לאנדאן אנגעקומען קיין קרית יואל צו פוקד זיין דעם ציון הק' להיפקד בדבר ישועה ורחמים, און אויסגענוצט די געלעגנהייט צו באזוכן בהיכל ישיבה ומתיבתא תורת צבי ספינקא וואס געפונט זיך אין קרית יואל.
דער וויזניצער רבי פון לאנדאן האלט זיך אויף אין ניו יארק דורכאויס די זוממער וואכן ווי באקאנט, און האט אויסגעדרוקט רצון קדשו ארויסצופארן קיין קרית יואל צו פוקד זיין דעם ציון הק' בעצם יומא דהילולא, גענוי ווי זיין פאטער הרה"ק בעל תורת מרדכי מוויזניץ זי"ע פלעגט פארן אין די פריערדיגע יארן צו פוקד זיין דעם ציון הק' פונעם סאטמארער רבי'ן פון וועם ער האט זיך געהאלטן א תלמיד, אין די טעג ארום די הילולא קדישא.
אנקומענדיג קיין קרית יואל איז דער רבי שליט"א צוערשט אנגעקומען צום ספינקא ישיבה, וואס שטייט בנשיאות כ"ק אדמו"ר מתולדות צבי ספינקא שליט"א, נאך וואס דער רבי שליט"א איז געלאדנט געווארן דורכ'ן ראש ישיבה הרה"ג ר' מרדכי הערש שפיטצער שליט"א. דער רבי האט באזוכט ביים ספינקא רבי'ן שליט"א, און דערנאך געדאווענט מנחה אינאיינעם מיט די תלמידי הישיבה.
נאך מנחה איז געפראוועט געווארן א מסיבת לחיים, אין שפיץ פונעם חשובן גאסט דער וויזניצער רבי, און דער ספינקא רבי נשיא הישיבה, דער ספינקא רבי האט אויפגעטרעטן מיט קורצער ווערטער זייענדיג מקבל פנים דעם חשובן גאסט, און דערנאך האט דער וויזניצער רבי אויפגעטרעטן מיט דברי ברכה והדרכה פאר די בחורי חמד, און געוואונטשן לחיים פאר אלע בחורים באזונדער.
