שטייענדיג נאך די שרעקליכע מיסיל אטאקע וואס האט באטראפן חסידי גור אין שטאט ערד, ווען א מיסיל פון איראן האט געמאכט א דירעקט היט צווישן באוואוינטע הייזער פון חסידי גור אין ערד, פירנדיג צו צענדליגע פארוואונדעטע, האבן כ"ק האדמורי"ם מסאטמאר און סקווירא שליט"א זיך פארבינדן טעלעפאניש צו כ"ק אדמו"ר מגור שליט"א, זיך צו אינטערסירן איבער די וואוילזיין פון חסידי גור אין ערד.
ביידע רבי'ס וואס האלטן אן א נאנטע קשר מיט כ"ק אדמו"ר מגור שליט"א האבן זיך אינטערסירט ביים גערער רבי'ן שליט"א איבער די שווערע נאכווייען, און די פראדוקטיווע ארבעט פון די עסקנים ארויסצוהעלפן די באטראפענע משפחות וואס האבן ליידער נישט קיין דאך איבערן קאפ, און אויסגעדרוקט גרייטקייט ארויסצוהעלפן מיט וואס מעגליך.
אין די זעלבע צייט איז היינט באקאנט געווארן די גוטע בשורה, אז א פיר יעריג יונגל וואס איז פארוואונדעט געווארן דורכאויס די מיסיל אויפרייס, ווען ער איז ארויסגעפאלן פון די פענסטער פון די פערטע שטאק צוליב די מאכטפולע אויפרייס, איז היינט ב"ה באפרייט געווארן פון שפיטאל.
