שטייענדיג א יאר זינט די געהויבענע נסיעה וואס הגה"צ גאב"ד סאטמאר מאנסי שליט"א האט אונטערגענומען צו די מקומות הקדושים אין אייראפע, אין באגלייטונג פון די הונדערטער חברי הקהילה קדושה וואס האבן אין א פאראייניגטע שטימונג מיטגעהאלטן דעם ערשטמאליגן מאורע, גרייט מען זיך אצינד צום גרויסן מעמד הכנסת ספר תורה פאר די ספר תורה וואס איז געשריבן געווארן דורך כל הקהל הקודש, און איז אנגעהויבן געווארן דארט ביי די נסיעה הרוממה אין שטאט קראקא אין פוילין.
אין לויף פון די לעצטע יאר האבן די הונדערטער חברי הקהילה קונה געווען א זכות אינעם ספר תורה, און אצינד ווען די ספר תורה איז שוין גרייט צו ווערן אריינגעגעבן, איז באשטימט געווארן די פלענער איבער די גרויסע חגיגה, וואס וועט פארקומען קומענדיגן חודש אדר הבא עלינו לטובה, זונטאג פרשת ויקהל, ביום פורים המשולש.
די גרויסע חגיגה וועט ארייננעמען עטליכע באזונדערע מעמדים, מעמד הכנה בעפאר יו"ט פורים, מעמד לגומרה של תורה, חגיגת הכנסת ספר תורה, און די פראכטפולע סעודה לגומרה של תורה, וואס דאס אלעס וועט פארוואנדלען די היי יעריגע פורים המשולש אין א ריכטיגע חגיגה המשולשת בתורה, במעמד קהל רב לכבוד התורה.
