בלויז עטליכע טעג נאך וואס די גרויסע שבת "בהיכלא דמלכא" וואס איז געווען באשטימט אויף שבת פרשת אחרי קדושים, אינאיינעם מיט די הונדערטער נדיבי לב נגידים ותומכים בחצר הקודש בעלזא, איז געווארן אפגעשטופט צוליב די מצב הבריאות פון כ"ק אדמו"ר מבעלזא שליט"א, איז היינט באשטעטיגט געווארן מיטן רבינ'ס פולסטע הסכמה אז די שבת וועט בעז"ה געפראוועט ווערן דעם קומענדיגן פרשת אמור הבעל"ט.
פארגאנגענעם דינסטאג נאך וואס כ"ק אדמו"ר מבעלזא שליט"א איז געווען שטארק אפגעשוואכט צוליב פארשידענע געזונטהייט קאמפליקאציעס, האט מען בלית ברירה אפגעשטופט דעם גרויסן געפלאנטן שבת "בהיכלא דמלכא", וואס איז געווען באשטימט פארצוקומען דעם שבת קודש פרשת אחרי קדושים אין די פראכטפולע די סיטי פעסטונג נעבן ירושלים, געאייגנט פאר די הונדערטער נדיבים ותומכים וואס שליסן זיך אן מיט ריזיגע סכומים לטובת די קרן הבנין פראיעקט פון פינף נייע ישיבה בנינים פאר חסידי בעלזא.
בחסדי ה' איז אבער אריבער עטליכע טעג, און דעם רבינ'ס מצב האט זיך עטוואס פארבעסערט, ביז דעם שבת ווען דער רבי איז אריינגעקומען צום טיש אין די גרויסע שטוב, און געפראוועט דעם שבת צווישן די חסידים. היינט זונטאג זענען די עסקנים אריין אל הקודש פנימה צום רבי'ן צו דורכשמועסן די ווייטערדיגע פלענער, אויף ווען מען זאל נאכאמאל באשטימען דעם שבת, און נאך עטליכע מינוט האט דער רבי שליט"א אויסגעדרוקט רצון קדשו אז מען זאל פראווענען דעם שבת שוין דעם וואך פרשת אמור, זאגענדיג אז ווער עס וועט קומען אויף שבת, וועט עס מיר צוגעבן א שטיק געזונט.
אצינד ווערן געמאכט די נויטיגע צוגרייטונגען דורך די טעטיגע עסקנים, זוכנדיג פאר א פאסיגע לאקאל בהרי ירושלים וואו צו קענען אפרעכטן דעם גאנצן שבת מבואו ועד צאתו, מיטן האפענונג אז דער רבי זאל האבן די כוחות צו באשיינען במלוא הדרו מיטן אויבערשטנס הילף.
