א שיינע מעמד הנחת אבן הפינה איז פארגעקומען פארגאנגענע וואך, ווען עס איז געלייגט געווארן די גרונדשטיין פאר א נייע ביהמ"ד "סאדאוונא" אין שטאט מאנסי, א בית המדרש לתורה ולתפילה וואס וועט בעז"ה זיין א תל תלפיות אין די אומגעגנט פון סאוט מעדיסאן און סאוט סענטראל אין ספרינג וואלי.
די ביהמ"ד ווערט געגרינדעט דורך הגה"צ ר' אלישע סעקולא שליט"א אבד"ק סאדאוונא מאנסי, א זון פון הגה"צ רבי יצחק יעקב סעקולא זצ"ל אבד"ק סאדאוונא, און איידעם ביי כ"ק אדמו"ר מסטריזוב שליט"א. דער רב שליט"א וועלכער דינט שוין לאנגע יארן אלס מרביץ תורה אין ישיבת קארלין סטאלין אין בארא פארק, איז ערווארטעט זיך אריבערצוציען קיין מאנסי אין די נאנטע צוקונפט, און משפיע זיין מהוד תורתו וצדקתו אויף די שיינע קהילה מיטן אויבערשטנס הילף.
פארגאנגענע וואך איז פארגעקומען די מעמד הנחת אבן הפינה פארן נייעם ביהמ"ד, אויפן שטח הבניה וואו עס קומט שוין פאר העפטיגע בוי ארבעט, די נייע בנין הביהמ"ד וועט אנהאלטן א גרויסע לופטיגע היכל ביהמ"ד, א פראכטפולע מקוה און דאווענען שטיבלעך, א דירה פארן רב שליט"א אויפן העכערן שטאק, און נאך פארשידענע איינריכטונגען לרווחת המתפללים, וואס וועט שטארק מרחיב זיין די גבולי הקדושה אין די גאנצע אומגעגנט.
