אין די יעצטיגע טעג גייט אריין אין קראפט א מאסיווע איבערבוי פראיעקט אין ביהמ"ד הגדול ראחמיסטריווקא, אינעם עיר ואם בישראל בארא פארק, דער מקום קדוש וואס דינט שוין דריי און צוואנציג יאר אלס מקום תורה ותפילה, באותו מקום וואו כ"ק אדמו"ר הרה"ק מראחמיסטריווקא זצ"ל האט אפגעראכטן זיין עבודת הקודש בסילודין, דארט וואו ממלא מקומו בקודש כ"ק אדמו"ר מראחמיסטריווקא שליט"א פירט ווייטער דעם שיינעם המשכה בעוז ובגבורה.
שטייענדיג שוין דריי און צוואנציג יאר זינט די ביהמ"ד איז באנייעט געווארן בכבוד והוד, זעהט זיך שוין אן די נויט צו איבערפרישן דעם בנין אין פארשידענע הינזיכטן, סיי די ערשטע שטאק פונעם היכל ביהמ"ד, און סיי די אונטערשטע שטאק וואו עס איז פארהאן די מקוה און עטליכע דאווענען שטיבלעך און נאך וויכטיגע איינריכטונגען.
אינעם ערשטן שלב וועט מען פולקאם איבערבויען און רענאווירן די אונטערשטע שטאק, מטעם הנהלת הקהילה איז געמאלדן געווארן אז פון קומענדיגן זונטאג ראה וועט די אונטערשטע שטאק זיין פארשלאסן, אלע מתפללים וועלן זיך קענען באנוצן מיט די מקוה פון ביהמ"ד בעלזא אויף די פינף און פערציגסטע סטריט, וואס די בעלזא קהילה האט צוגעשטעלט בטוב עין, און די טעגליכע קביעות'דיגע מנינים וועלן פארקומען אין ביהמ"ד הגדול וואס וועט זיין איינגעטיילט אין דריי באזונדערע שטיבלעך.
די בוי פראיעקט ביי די אונטערשטע שטאק וועט צוברענגען א פערטע שטיבל צום דאווענען, נאך שויערס אין די מקוה און וויכטיגע איינריכטונגען, א גרויסע קאווע צימער און א נייע שמש שטיבל. דערנאך וועט מען פראכטפול רענאווירן די היכל ביהמ"ד זעלבסט, מיט נייע מארמארשטיין, נייע טויערן און נייע לעקטערס, לפאר ולרומם את בית ה'.
דורכאויס די רענאוואציע פראיעקט וועט כ"ק אדמו"ר מראחמיסטריווקא שליט"א דאווענען די תפילות מדי יום ביומו אינעם אלטן ביהמ"ד בביתו נאוה קודש פונעם רבי'ן זצ"ל, און בעז"ה לקראת די הייליגע טעג וועט די ביהמ"ד ווערן צוריקגעעפנט מיט א כלילת יופי פארן ברייטן ציבור.
