שטייענדיג א קארגע וואך בעפאר די גרויסארטיגע מעמד "מקדישי שמך", וואס וועט בעז"ה צוזאמברענגען אלפי חסידי וויזניץ פון איבער גאנץ ארץ ישראל פאר א גרויסע מעמד תפילה און מעמד פתיחת המגבית לטובת איגוד מוסדות וויזניץ, איז היינט געמאלדן געווארן מטעם בית כ"ק אדמו"ר מוויזניץ שליט"א לרפו"ש אז די כינוס וועט פארקומען אין ירושלים עיה"ק, אנדערש ווי די ארגינעלע פלאן אפצורעכטן דעם כינוס אין אתרא קדישא מירון.
מיט עטליכע וואכן צוריק איז פראקלאמירט געווארן די פלענער איבער א גרויסע מעמד תפילה וואס וועט פארקומען דעם דינסטאג פרשת שופטים ליל ערב ראש חודש אלול, ווען כ"ק אדמו"ר מוויזניץ שליט"א לרפו"ש וועט ארויספארן קיין אתרא קדישא מירון אינאיינעם מיט טויזענטער חסידים, מתפלל זיין לישועת הכלל והפרט און בפרט איבער די לעצטיגע רדיפת הדת בארץ הקודש, נאכגעפאלגט מיט א גרויסן מעמד פתיחת המגבית לטובת איגוד מוסדות וויזניץ.
אין די לעצטערע טעג איז אבער אנטשטאנען ערנסטע צווייפלען איבער די ארגינעלע פלענער, נאך וואס דער וויזניצער רבי שליט"א איז ליידער היבש אפגעשוואכט פון זיין שווערן מצב הבריאות ל"ע, און לעת עתה איז דער רבי נישט בכח ארויסצופארן דעם לאנגן וועג קיין אתרא קדישא מירון, דער רבי שליט"א זעלבסט האט אויסגעדרוקט רצון קדשו צו אנטייל נעמען ביי דעם מעמד, און דעריבער האט דער רבי געבעטן אז מען זאל אפרעכטן דעם מעמד אין ירושלים עיה"ק, וואו ער וועט מיטן אויבערשטנס הילף זיך קענען משתתף זיין.
די עסקנים ארבעטן העפטיג אין די טעג אויסצוארבעטן די פלענער וואו צו אפרעכטן דעם גרויסן מעמד, און יעצט נאכמיטאג איז באשטעטיגט געווארן אז עס וועט בעז"ה פארקומען אינעם ריזן היכל ביהמ"ד הגדול דחסידי גור אין ירושלים. דער וויזניצער רבי שליט"א האט אפעלירט צום עולם פערזענליך דורך א מעסעדזש אויפן טעלעפאן, און געבעטן דעם ציבור זיך צו משתתף זיין ביי דעם כינוס הכללי, זאגענדיג אז יעדער מענטש איז חשוב לזכות עולם התורה, און דער רבי דרוקט זיך אויס אז ער האפט אז במשכ'ן ווינטער וועט מען קענען זיין אויף שבת ביי מירון ביי ר' שמעון.
