א גאר אייגנארטיגער מעמד איז פארגעקומען פארגאנגאנע וואך דאנערשטאג פ' כי תצא, ווען א גרויסער ציבור פון עסקנים און אישי הציבור, מערערע נדיבי עם אין שפיץ פון גדולי הרבנים ואדמורי"ם שליט"א האבן זיך פאראייניגט תחת קורת גג אחד צו קומען און ארויסווייזן שטיצע און סאלידאריטעט פאר די הייליגע פעולות פון דעם מוסד הק' כנפיים, ביי דעם היסטארישן און התרגשות'דיגן מעמד "קידוש בית החיים" פאר די נייע חלקה פון דעם מוסד, וועלכע מען האט יעצט אפגעקויפט און מקדש געווען אין ביה"ח הר שלום אין מאנסי.
די פעולות פונעם מוסד דארפן נישט קיין איבריגע ערקלערונגען, בהצנע לכת און בדרך כבוד אויף דאס מערסטע וואס איז שייך זענען זיי שטענדיג גרייט צו קומען צו הילף פאר די משפחות וועלכע גייען דורך א פריצייטיגע פארלוסט ל"ע, מיט הילף, חיזוק, טאט און ראט אויפן מעדיצינישן הלכה'דיגן פראנט, אלעס מיט די הוראות און פערזענליכע באגלייטונג פון גדולי ההוראה וועלכע געבן זיך אוועק צו העלפן די משפחות דורכגיין די שוועריגקייט פון באגלייטן א ניי געבוירן קינד למנוחת עולמים ה"י.
אלס דער פרישסטער טייל פון זייערע פעולות לטובה האבן זיי, בהוראת גדולי דורינו שליט"א, אפגעקויפט א חלקה אין דעם ביה"ח הר שלום, זייט ביי זייט מיט די חלקות פון קהלות קדושות בישראל, וואו מען האט גרייט חלקות על כל צרה שלא תבא, צו קענען געבן דעם כבוד און רואיגקייט פאר די משפחות, אפטמאל גאר אינגע, וועלכע דארפן זיך ספראווען מיט אזא דורכגאנג, עס זאל זיין מיט א הארציגן אידישן מיטגעפיל, און פארגרינגערן די מאמענטן וויפיל עס איז שייך.
אין צוזאמענהאנג מיט דעם אפקויפן און מקדש זיין דעם ביה"ח, האט מען פארגאנגאנע וואך אפגעראכטן א מעמד ואסיפת חיזוק, וואו מערערע עסקנים און אישי ציבור, זייט ביי זייט מיט א גרויסן ציבור נדיבי עם וועלכע האלטן מיט פון דער נאנט די פעולות האבן געשפירט פאר א זכי' צו קומען און זיך באטייליגן ביי דעם באשיידענעם מעמד אויפן שטח נאנט צום ביה"ח. כאטש עס האבן געגאסן שווערע רעגנס אומאויפהערליך, האבן די משתתפים זיך אנגעשטערענגט זיך צו באטייליגן און אנטייל נעמען אין דעם פראיעקט וואס טוט אפווישן די הייסע טרערן פון עלטערן וואס גייען דורך א פארלוסט ל"ע.
דער יושב ראש המעמד איז געווען דער בארימטער מגיד מישרים, הרה"ג נואם בחסד עליון ר' שמואל יצחק פעפערקארן שליט"א, מנהל ישיבת סטאלין קארלין לעיקוואוד. ער האט מיט זיין כח הדיבור אויפגעשטורעמט די הערצער, צוגלייכנדיג דעם פלאקערדיגן פייער פון מסירות נפש פון די עסקנים צו א פייגעלע וואס פליט אריין אין א שטורעם; כאטש עס זעט אויס ווי עס קען זיך קוים רירן און פליט מיט בלויז 9 מייל א שעה, לייגט עס אבער אריין אומגעהויערע ענערגיע, און ווי נאר עס קומט ארויס פליט עס מיט הונדערט מייל א שעה. "דאס איז דער כח פון כנפיים וואס גייט אריין אין די גרעסטע שטורעם צו העלפן משפחות אין זייערע שווערסטע מאמענטן," האט דער יושב ראש ארויסגעברענגט מיט א גערירטע שטימע, ארויסברענגענדיג ווי די משפחות דארפן דאס דורכגיין, און וואס עס מיינט זיי צו קומען צו הילף.
נאך זיינע ווערטער האט דער יושב ראש מכבד געווען הרה"ח ר' מאיר שלום געטנער הי"ו, מנהל פון בית החיים הר שלום, וועלכער האט אויפגעטרעטן מיט קורצע ווערטער וואו ער האט באטאנט ווי די ארגאניזאציע פירט אויס דעם 'הטוב והמטיב' דורך ברענגען ריינע נשמה'לעך צו מנוחה נכונה מיט אן אומגעהויערע דרך כבוד ובהצנע לכת.
דערנאך האט אויפגעטרעטן דער חשוב'ער רב וועלכער שטייט גרייט פאר אלע עניני רפואה וכבוד החיים, הגה"צ רבי צבי הירש ראבינאוויטש שליט"א אב"ד כוכבי יצחק באבוב מאנסי. דער רב האט ארומגערעדט בטוב טעם ודעת אז דער מורא'דיגער חסד פון כנפיים איז א טאפלטער, סיי א יקרא דשכבי פאר די ריינע נשמות שלא טעמו טעם חטא, און אויך א מורא'דיגע יקרא דחיי וואס ברענגט חיזוק און נעמט אראפ די שווערע לאסט וואס ליגט אויף די הערצער פון די צובראכענע משפחות. דער רב האט צוגעגעבן אז די זכות פון העלפן די נשמות וועט זיכער מאכן אז זיי זאלן זיין א מליץ יושר פאר אלע תומכים.
דער יושב ראש האט דאן באדאנקט אלע עסקנים ואישי הציבור וועלכע קומען צו הילף סיי ווען, ובפרט דער חשוב'ער דאקטאר הר"ר דוד לובעל הי"ו, א פראפעסיאנאלער דאקטאר מיט א אידיש הארץ וועלכער שטייט גרייט פאר די משפחות בכל זמן ועידן מיט געטריישאפט און מסירות נפש. דער יו"ר האט געצויגן א טרעפליכע אבער פיינפולע פארגלייך צו אונזערע עלטערן אין מצרים; כאטש א טאטע האט געקענט טראגן דעם יאך פון שלעפן שווערע ציגל א גאנצן טאג, איז אבער די שווערסטע דורכגאנג, את עמלינו, געווען ווען ער האט געדארפט דורכגיין דעם שווערן פארלוסט פון די קליינע קינדער וואס זענען נעבעך אוועק און אריינגעלייגט געווארן אין די ווענט. "דא נעמען די עסקנים אראפ דעם דאזיגן טיפן צער פון די משפחות," האט ער באטאנט, וואס עס באדייט און וויפיל עס דערלייכטערט.
עס האט אויפגעטרעטן אויף ענגליש דער חשוב'ער כלל טוער מסור בלו"נ למען אחב"י בכלל ובפרט הרב בנציון קלאצקאו שליט"א. מיט טרערן האט ער איבערגעגעבן זיין פערזענליכע קאפיטל איבער א פריצייטיגע פארלוסט ביי אים אין די משפחה. באטאנענדיג דער חילוק פון בית החיים אין ווארשע, וואו מ'האט ל"ע אין די מלחמה יארן באערדיגט אין קברי אחים אן קיין פלאץ זיך אויסצואוויינען, קעגן דעם ביה"ח אין לאדזש וואו מ'האט באערדיגט יעדן באזונדער וואס ברענגט א פיל גרעסערע נחמה. ענליך, האט ער ארויסגעברענגט, גלייך ווי ביי א פארלוירענע אבידה, לא תוכל להתעלם - מען טאר זיך נישט מתעלם זיין, אידישע קינדער מוזן ארויסווייזן א שותפות'דיגע מיטגעפיל מיט די עלטערן אין זייער צער.
אן ערנסטקייט האט באנומען דעם ציבור ווען עס האט אויפגעטרעטן הגה"צ המפורסם מגדולי המורים לעניני רפואה רבי זושא אויש שליט"א דער רב פון מוסד הק' כנפיים. דער רב שליט"א האט אראפגעלייגט במתק לשונו וואס איז דעם סוד פונעם נאמען "כנפיים", באזירט אויף וואס ווערט געברענגט אין מדרש איבער א פייגל וואס דער באשעפער האט באשאפן מיט קאלירפולע שיינע פליגלען וואס ווען זי ווערט צובראכן און קוקט דערויף בארואיגט עס איר. "אין א זמן ווען עס הערשט א טיפע צובראכנקייט, זענען די עסקנים די פליגלען וואס ברענגען א רואיגקייט פאר די עלטערן", דער רב האט אנגעוויזן ווי כנפיים טוט אן עבודת הקודש אפילו אין די קליינע דעטאלן, אזוי ווי שפרה און פועה וואס האבן געטון אלע קלייניגקייטן צו ראטעווען אידישע קינדער, נישט אייביג קען מען ממש העלפן אדער היילן, אבער מען קען און מען דארף צו יעדע געלעגנהייט טוהן וואס מען קען צו לינדערן דעם צער און קומען צו די הילף פון אידישע קינדער בעת צר, וואס איר וויכטיגקייט און כח איז אומבאגרייפבאר.
צום שלוס פון דעם היסטארישן מעמד האט מען געהערט דעם א-ל מלא רחמים לע"נ הנעדרים ע"ה וועלכע עס האט פארגעזאגט דער בארימטער חזן מו"ה יחזקאל ברעכער הי"ו, מיט זיין באגאבטן חזנ'ישע שטומע און השתפכות הנפש, ווען דערנאך איז מען זיך צוגאנגען מיט געפילן פון חיזוק און שטיצע, ווייטער צו שטיין צו הילף פאר די משפחות ווען זיי דארפן דאס, און א תפלה אז מען זאל שוין נישט מער הערן פון צער ועגמת נפש, נאר שטענדיג גיין און קומען אויף שמחות, ביז יקיצו וירננו שוכני עפר בביאת הגואל אמן.
