חסידי צאנז קלויזענבורג בארץ הקודש האבן אויפגענומען מיט גרויס פרייד די בשורה טובה, אז הנה מלכך בא, כ"ק אדמו"ר מצאנז קלויזענבורג שליט"א נעמט אונטער א מסע הקודש קיין ארץ ישראל, שטייענדיג שוין סמוך ונראה צו די ימי הרחמים והרצון.
דער רבי שליט"א האט שוין עטליכע מאל אונטערגענומען א מסע הקודש קיין ארץ ישראל אין חודש אלול, צו פוקד זיין דעם ציון הק' פון אביו הגדול כ"ק אדמו"ר הרה"ק מצאנז קלויזענבורג זצ"ל בעל שפע חיים, מתפלל זיין ביי די מקומות הקדושים, און אויפנעמען דעם ציבור חסידים לקראת די הייליגע טעג.
אצינד האט דער רבי שליט"א ווידער אויסגעדרוקט רצון קדשו ארויסצופארן אויף א נסיעה קיין ארץ ישראל לקראת חודש אלול, איבערהויפט ווען מ'גרייט זיך אפצורעכטן א רייע מעמדים און מאורעות פון הרחבת גבולי הקדושה אינערהאלב קהילה ומוסדות צאנז קלויזענבורג בארה"ק, די מעמד קביעת מזוזה פאר די נייע בנין התלמוד תורה אין בני ברק, די גמר המקח פארן שטח הקהילה אין ירושלים עיה"ק, און נאך פארשידענע מאורעות און שמחות צווישן חסידי צאנז קלויזענבורג בארה"ק.
דער רבי שליט"א פארט ארויס פון ניו יארק יעצט מיטוואך מיטאג, און איז ערווארטעט צו לאנדן בשערי ארץ הקודש מארגן דאנערשטאג אינדערפרי. דער רבי שליט"א וועט באלד צופארן קיין עיה"ק צפת לבית האכסניא אין שטוב פון הנגיד החסיד ר' יעקב שלום פישער ע"ה, וואו דער רבי שליט"א וועט זיך אויפהאלטן דורכאויס די ימי הנסיעה.
די הויכפונקט פון די מסע הקודש וועט זיין א געהויבענע שבת וואס דער רבי שליט"א וועט פראווענען אינאיינעם מיט קהל חסידיו ומעריציו תושבי ארה"ק, די שבת וועט געפראוועט ווערן אין אלטשטאט צפת, אין מתחם תומר דבורה וואס ווערט שוין צוגעגרייט אין די יעצטיגע טעג צו קענען אקאמאדירן דעם גרויסן ציבור חסידים פון נאנט און ווייט.
דער רבי שליט"א וועט פארבלייבן אין ארץ ישראל פאר די נאכפאלגענדע טעג צו אויפנעמען דעם ציבור און באשיינען מעמדים, שמחות און מאורעות בקרב הקהילה, און אויפנעמען די חסידים מיט קוויטלעך לקראת די הייליגע טעג הממשמשים ובאים.
