זעלטענע אויסדרוקן פון התפעלות געהערט פון הגה"צ רבי יהושע דוד טורטשין שליט"א ביי די מעמד פארהער בביתו אונטערשטרייכנדיג אז ווען איך זעה עס נישט מיט מיינע אויגן וואלט איך עס נישט געגלייבט! - כ"ק אדמו"ר מקהל חסידי ירושלים דרוקט זיך אויס אז ער מקנא די קינדער מיט זייער בקיאות - הגה"צ המשפיע ר' יהודה דייטש שליט"א איז מפליא די אויסטערלישע בקיאות באטאנענדיג אז מ'זאגט אז היינט איז דא ירידת הדורות - ער זעט עליות הדורות! - הגאון הגדול רבי אשר אראלי: צו אזא בקיאות בתורה קומט מען אן נאר דורך התמדה! -דער אורח הכבוד ביי דער מעמד הרבני הנגיד ר' יעקב מרדכי יאזשעף שליט"א טיילט מיט הרגשי לבו ביי דער מעמד!
הונדערטער בני ירושלים און מיטגלידער פון די קהילה הק' 'תורה ויראה' האבן דער פארלאפענער ליל שישי לסדר 'ראה אנכי נותן לפניכם' געשטראמט צו די אפגעדינגענער שול פון בית מדרש הגדול דחסידי תוא"י מיטצוהאלטן א מעמד הוד פון סיומי מסכתות בבא קמא און בבא מציעא פון די ילדי תלמוד תורה 'תורה ויראה' פון כיתה ה' און העכער.
דער מעמד האט געדינט אלץ מעמד סיום, אבער איז געווען א דירעקטער המשך פון א היסטארישע מעמד הפארהער, וואו די חשובע קינדער האבן זיך געשטעלט אויף א פארהער אויף די מסכתות בבא קמא און בבא מציעא בעל פה נישט אויסלאזנדיג דערביי קיין איין רש"י אדער תוספות.
פאר לאנגע יארן האט די חשובע מוסד א סדר וואו זיי לערנען מיט די קינדער די צוויי מסכתות. מען לערנט עס גרינטליך און נאך דעם הייבט מען צו מאכן אסאך חזרה אויף די לימוד, וואו זיי זענען חוזר ושונה די פרקים פון די מסכתא, ביז ווען זיי קענען די מסכתא ישר והפוך מיט אלע אירע רשי"'ס און תוספות'ער.
מידי שנה בשנה מאכן זיי די חזרה און שטעלן זיך אויפ'ן פארהער ביי די גאוני וצדיקי ירושלים. יעדער יאר איז עס פון פריש א מחזה הוד צוזען ווי אזוי קינדער אין די עלטער פון 11-12 קענען בעל פה א מסכתא שלימה און ווייזן ארויס א זעלטענע שליטה אין יעדע דף און דף און אויך אין די רש"י און אין די תוספות.
אויך היי יאר זענען די קינדער אריבער די זעלבע חזרה. נאך שעה'ן לאנג פון חזרה און שונה זיין די לימודים, האבן זיי זיך געשטעלט צום פארהער ביי די רבנים הגאונים והצדיקים שליט"א, וועלכע זענען ארויס פון התפעלות פון די ברייטע און טיפע קענטעניס פון די ילדי הת"ת.
די פארהער בבית הרבנים שליט"א
בראש הרשימה פון די בוחנים איז געשטאנען דער חשובער ראש הישיבה הגה"צ רבי יהושע דוד טורטשין שליט"א.
מער ווי צוויי שעה זענען די קינדער געזעסן במחיצתו ביי אים אין שטוב און זיך פארהערט אויף די צוויי מסכתות. דער ראש הישיבה שליט"א איז איבערגעגאנגען מיט די קינדער אלע סוגיות אין די צוויי מסכתות, די בלעטער, די רש"י'ס און די תוספות א לענגערע צייט, ביים ענדע האט ער מפליא געווען בהתפעלות די ברייטע קענטעניס פון די תלמידים ווי אזוי אויך אין אזעלכע צייטן קען מען מגדל זיין א דור מיט אזעלכע תלמידי חכמים און זיך אויסגעדרוקט אז ווען ער זעט עס נישט מיט די אייגענע אויגן וואלט ער עס נישט געזען.
וכמעשהו ביי דער ראש הישיבה שליט"א האט זיך איבערגע'חזר'ט די זעלבע זאך ביי די פארהער אין שטוב פון כ"ק אדמו"ר מקהל חסידי ירושלים שליט"א.
א לענגערע צייט איז דער רבי שליט"א געזעסן און פארהערט די קינדער איבערגייענדיג בלאט נאך בלאט, רש"י נאך רש"י, און האט מפליא געווען די בקיאות און די זעלטענע שליטה פון די קינדער אין די מסכתא.
נאך דער פארהער האט דער רבי שליט"א זיך אויסגעדרוקט אז ער איז מקנא די קינדער און זייער ברייטע שליטה אין די מסכתא.
אויך ביי דער פארהער ביים אוועלטליכן מגיד שיעור הרה"ג ר' אשר אראלי שליט"א האט זיך איבערגע'חזר'ט די מחזה הוד. דער גאון שליט"א האט פארהערט די קינדער און אין ליכט פון די ברייטע קענטעניס האט ער אויסגעדרוקט זיין טיפע התפעלות באטאנענדיג דערביי אז צו די ברייטע קענטעניס קומט מען אן נאר דורך התמדה פון לערנען און חזר'ן אן אויפהער.
די קינדער האבן אויך זוכה געווען צו א פארהער ביים גרויסן גאון וגדול רבי יהושע כהן שליט"א וועלכער איז ארויס פון די כלים צוזעענדיג די אויסטערלישע התמדה פון די קינדער.
אויך ביי די פארהער בבית המשפיע הגה"צ רבי יודל דייטש שליט"א האט מען געזען די הפלא'דיגע ידיעה בתורה און ביים שמועס וואס ער האט געגעבן פאר די קינדער נאכ'ן פארהער האט ער זיך אויסגעדרוקט אז מ'הערט כסדר רעדן אז היינטיגע צייטן איז דא א ירידת הדורות אבער ער זעט פאר זיינע אויגן אן עליה, אז יונגע קינדער זאלן קענען אזוי גוט און האבן אזא קלארקייט אין א מסכתא דאס איז א סימן אז עס איז דא עליה.
דער גרויסער מעמד הסיום
נאך די פארהער בבית הרבנים הגאונים שליט"א און נאך די גרויסע מעמד ה'פארהער' וואס איז געווארן אפגעראכטן ברבים אין די שול פון 'תורה ויראה' אין די עפענטליכקייט דורך די רבני הקהילה איז פארגעקומען די מסיבת סיום אין דער בית מדרש הגדול פון תולדות אברהם יצחק.
ביי די מעמד האבן אנטיילגענומען די רבני הקהילה ובראשם ראש הישיבה מורינו הרה"ג רבי זעליג ראובן קאצענעלנבויגן שליט"א און אויך דער ראש הישיבה הגה"צ רבי יהושע דוד טורטשין שליט"א און כ"ק אדמו"ר מקהל חסידי ירושלים שליט"א.
באזונדער האט זיך דערקענט דער גאסט פון אמעריקע הרבני הנגיד ר' יעקב מרדכי יאזשעף שליט"א וועלכער איז געקומען צופארן פון אמעריקע ספעציעל אנטיילצונעמען אין די מעמד. דער חשובער נדבן שליט"א האט אויך מיטגעהאלטן די בחינה וואס איז געווארן אפגעראכטן אין די עפענטליכקייט.
ביי דער מעמד האבן אויפגעטרעטן די חשובע רבנים הבוחנים און מרבה געווען לספר בשבחו פון די חשובע קינדער און ברבים מפליא געווען די זעלטענע בקיאות פון די קינדער. בראש ובראשונה האט אויפגעטרעטן דער חשובער ראש הישיבה הגה"צ רבי יהושע דוד טורטשין שליט"א און געגעבן דברי ברכה און מיטגעטיילט די בקיאות פון די חשובע קינדער זיך אויסדרוקנדיג אז לולא ווען איך זעה עס נישט מיט די אייגענע אויגן - וואלט איך עס נישט געגלייבט.
נאך אים האט אויפגעטרעטן כ"ק אדמו"ר מקהל חסידי ירושלים שליט"א און געשילדערט די זכיה וואס די קינדער האבן און זייער קענטעניס בתורה און זיין התפעלות ביי די בחינה פון די קינדער און ביים ענדע האט ער געגעבן ברכת קדשו אז זיי זאלן גיין מחיל אל חיל און ממשיך זיין ווייטער און ווייטער.
באזונדער האט זיך דערקענט די ערשיינונג פון הגה"צ רבי יהודה דייטש שליט"א וועלכער האט געזאגט אז ער האט זיך נישט געקענט איינהאלטן און געשפירט אז ער מוז קומען זיך משתתף זיין ביי דער גרויסער מעמד און דערביי נאכאמאל באטאנט פאר די עלטערן אז ער זעט דא אן עליות הדורות און און מפליא געווען זייער בקיאות.
נאך דעם האט מען געהערט קורצע און ווארעמע ווערטער פון דער אורח הכבוד הרבני הנגיד רבי יעקב מרדכי יאזשעף שליט"א וועלכער האט זיך מטריח געווען בטירחא דגופיה צוקומען מיטהאלטן דער מעמד. אין זיינע ווערטער האט ארויסגעברענגט רגשי לבו צוזעענדיג דער מעמד ה'פארהער און ווי אזוי די יונגע צורבא מדרבנן'ס קענען אזוי גוט די מסכתא, אז זיי שפרינגען אונטער צוקענען ענטפערן די תשובות.
אין זיינע ווערטער האט ער אויך דערמאנט ווי פאסיג עס איז אז די מעמד ווערט אפגעראכטן שטיינדיג אין די 3 טעג פון די הילולא קדישא פון רביה"ק מסאטמאר זי"ע און אז עס איז ביי אים קלאר אז די גרויסע בקיאות וואס מ'זעט דא איז בזכות אז מ'איז אפגעשיידט פון די שלטון הרשע און מ'לערנט תורה בקדושה ובטהרה.
א שטילקייט האט געהערשט אין זאל ווען הרה"ג רבי זעליג ראובן קאצענעלנבויגן שליט"א האט גענומען דאס ווארט. א לענגערע צייט האט ער ארומגערעדט בשבח פון לימוד התורה, איר חשיבות, די וויכטיגקייט אריינצוגעבן די נושא אין די קינדער און אויסגעלויבט די קינדער און אויך די שטאב.
צום לעצט איז געהערט געווארן א שיינע דרשה פון דער פה מפיק מרגלית און באקאנטער רעדנער הר"ר לייבוש ליש שליט"א וועלכער האט זיך געפינען צוגאסט בארה"ק.
אין זיינע ווערטער האט דער חשובער רעדנער אויפגעפלאמט די קינדער כדרכו און אריינגעברענגט אין זיי א חיות.
דער מעמד האט זיך געשלאסן מיט א חלוקת פרסים, די קינדער האבן באקומען ש"ס סעט'ן פון דער חשובער מנהיג הקהילה הרה"ג ר' זעליג ראובן שליט"א.
א לענגערע צייט האט אנגעהאלטן די פייערדיגע ריקודים נאך די מעמד, וואו די קינדער האבן זיך געפרייט און געזינגען זיך פרייענדיג בשמחת התורה.
