חסידי סקווירא נעמען אויף מיט גרויס איבערראשונג אז די קינדער פון כ"ק אדמו"ר מסקווירא שליט"א, הרה"צ ר' אהרן מענדיל טווערסקי שליט"א און הרה"צ ר' חיים מאיר טווערסקי שליט"א, וועלן ארויספארן אויף א געהויבענע נסיעה קיין ארץ ישראל דעם ווינטער, אין באגלייטונג פון פילע חסידים וואס וועלן אויסנוצן די געלעגנהייט און מיטפארן אויף די געהויבענע נסיעה לחונן עפר ארץ הקודש.
די צוויי זיהן פונעם רבי'ן שליט"א וועלכע שטייען אצינד בעפאר די שמחת החתונה פון א קינד למזל טוב בשעה טובה ומוצלחת, נעמען אונטער די נסיעה קיין ארץ ישראל צו מתפלל זיין ביי די קברי צדיקים אשר בארץ המה, די גרויסע זיידעס די אבות הקדושים, איינצולאדענען צו די חתונה ווי עס איז איינגעפירט שוין לאנגע יארן.
שטייענדיג אצינד שוין צען יאר זינט כ"ק אדמו"ר מסקווירא שליט"א האט דאס לעצטע מאל אפגעראכטן א מסע הקודש קיין ארץ ישראל, און מיטן רבינ'ס הויכן עלטער בליעה"ר זעהט נישט אויס אז דער רבי שליט"א וועט נאך אפרעכטן א גרויסע נסיעה קיין ארץ ישראל, איז געמאלדן געווארן אז די דאזיגע נסיעה וועט זיין א געלעגנהייט פאר די פילע חסידים וואס ווילן פארן קיין ארץ ישראל, מיטצופארן אינאיינעם מיטן רבינ'ס קינדער און מתפלל זיין ביי די קברי צדיקים להיפקד בדבר ישועה ורחמים.
די נסיעה איז באשטימט אויף קומענדיגן חודש טבת, דינסטאג פרשת וארא וועט מען זיך ארויסלאזן אין וועג, און שבת קודש פרשת וארא וועט געפראוועט ווערן א גרויסארטיגע שבת פאר חסידי סקווירא מיט די הונדערטער חסידים פון אמעריקע, אין א פראכטפולע און באקוועמע לאקאל בפלטרין של מלך, בעיר הקודש ירושלים.
אין לויף פון די ימי הנסיעה וועט מען מתפלל זיין ביי די קברי צדיקים אין מירון צפת טבריה, זייענדיג אין מירון וועט געפראוועט ווערן א גרויסע מעמד הדלקה אין שפיץ פון די קינדער פון רבי'ן, מוצאי שבת קודש וועט מען מתפלל זיין ביים שריד בית מקדשינו דער כותל המערבי, און דורכאויס די ערשטע טעג פון פרשת בא וועט מען מתפלל זיין ביים מערת המכפלה אין חברון, קבר רחל אין בית לחם, די קברי צדיקים אויפן הר הזיתים און הר המנוחות, און ביים ציון הק' פון צדיקי בית וויזניץ אין בני ברק.
