בחצר הקודש באבוב איז דעם יו"ט שמחת תורה געמאלדן געווארן שטארקע נייעס, מיטן באשטעטיגונג אז כ"ק אדמו"ר מבאבוב שליט"א וועט אונטערנעמען א מסע הקודש קיין ארץ ישראל דעם ווינטער הבעל"ט, און אין א ערשטמאליגע פארנעם פראווענען א גרויסע שבת מיט נדיבי לב אין אלטשטאט ירושלים, סמוך ונראה צום שריד בית מקדשינו דער כותל המערבי.
די מסע הקודש איז באשטימט אויף חודש שבט הבעל"ט, ווען דער רבי שליט"א וועט זיך ארויסלאזן על אם הדרך אויף א לענגערע נסיעה קיין ארץ ישראל, מחזק צו זיין קהל עדת צאן מרעיתו די הונדערטער באבובער חסידים תושבי ארץ הקודש, און צום הויכפונקט וועט דער רבי שליט"א פראווענען דעם היסטארישן שבת אין אלטשטאט ירושלים, צו וואו עס ווערן געלאדנט פילצאליגע נדיבים בעם נגידים ושועים, וואס לאזן זיך קאסטן אסטראנאמישע סכומים לטובת עטליכע בוי פראיעקטן אינערהאלב קהילות ומוסדות באבוב אלוועלטליך.
די שבת וואס איז באשטימט אויף פרשת בשלח שבת שירה, וועט זיין געווידמעט פאר אלע נדיבים וואס וועלן מנדב זיין כאטש א פערטל מיליאן דאללער פאר די בוי פראיעקטן, וואס נעמט אריין די אויפבוי פון די נייע בנין ביהמ"ד הגדול והחדש דחסידי באבוב אין ירושלים, די אויפבוי פון די נייע בניני הישיבות דחסידי באבוב אין סטעטן איילענד, און די אויפבוי פון די נייע בנין של שמחה וחסד אין בארא פארק, וואס איז אין די יעצטיגע וואכן פראקלאמירט געווארן ווי באריכטעט.
