מטעם בית כ"ק אדמו"ר מסערדאהעלי שליט"א איז געמאלדן געווארן די פלענער איבער א געהויבענע מסע הקודש וואס דער רבי שליט"א נעמט אונטער קיין ארץ ישראל אינאיינעם מיט פילע חסידים ומעריצים, צו פוקד זיין על קברה פון אמה של מלכות הרבנית הצ' מסאמבאטהעלי ע"ה, וואס ליגט באערדיגט אויפן הר המנוחות.
דער רבי שליט"א פארט איינמאל אין עטליכע יאר קיין ארץ ישראל צו מתפלל זיין ביים ציון פון די מאמע הרבנית ע"ה, אשת חבר הגה"ק מסאמבאטהעלי זצ"ל, און טאכטער פונעם מאקאווער דיין הגה"צ רבי חיים יהודה דייטש זצ"ל. ווי באקאנט איז דער מנהג נישט צו אויסלאזן זיבן יאר אן פוקד זיין דעם ציון פון די עלטערן, וואס דאן גייט מען מער נישט מתפלל זיין דארט.
קומענדיגע וואך מאנטאג פרשת נשא, צוויי טעג נאך יו"ט שבועות הבעל"ט, וועט זיך דער רבי ארויסלאזן אויף די געהויבענע נסיעה אין באגלייטונג פון פילע חסידים ואנשי מעשה, איידערן ארויספארן וועט פארקומען א מעמד צאתכם לשלום לכבודו פונעם רבי'ן, נאך שחרית אין ביהמ"ד סערדאהעלי אין בארא פארק.
באלד ביים אנקומען קיין ארץ ישראל דינסטאג אינדערפרי וועט דער רבי צופארן קיין תל אביב, און דאווענען שחרית בביתו נאוה קודש פון הרה"ק מבעלזא זי"ע אויף רחוב אחד העם, דער מקום קדוש וואו דער בעלזא רב זי"ע האט געוואוינט און פון דארט משפיע געווען אויף טויזענטער אידן איבער די גאנצע וועלט.
שפעטער פארמיטאג וועט דער רבי אריינפארן קיין ירושלים עיה"ק לבית האכסניא אויף רחוב יואל, און פון דארט וועט דער רבי אנקומען צום הר הצופים מול מקום המקדש, אויף א מעמד התעוררות ורחמים ברוב עם. צומארגנס מיטוואך וועט דער רבי מתפלל זיין על קברה פון אמו הרבנית הצ' מסאמבאטהעלי ע"ה אויפן הר המנוחות, און דאנערשטאג י"ב סיון וועט דער רבי ארויספארן אינאיינעם מיט קהל חסידיו צו מתפלל זיין ביי די קברי צדיקים אין גליל, אין מירון צפת און טבריה.
שבת קודש וועט דער רבי פראווענען בעיה"ק ירושלים אויף א פארמאכטע פארנעם, און זונטאג וועט דער רבי מתפלל זיין ביי די קברי צדיקים אויפן הר המנוחות און די הר הזיתים. מאנטאג וועט דער רבי ארויספארן צו מתפלל זיין ביים קבר רחל און ביים מערת המכפלה, און דאנערשטאג פרשת בהעלותך וועט זיך דער רבי שליט"א ארויסלאזן אויפן וועג צוריק אהיים קיין ניו יארק.
