אלפי חסידי בעלזא האבן אויפגענומען מיט איבערראשונג די נייע בקשה וואס כ"ק אדמו"ר מבעלזא שליט"א האט געשיקט פאר אלע חסידים איבער די וועלט, אז מען זאל מוסיף זיין צו צינדן נאך א ליכטעלע יעדן שבת און יום טוב, אינזין צו האבן פארבלאנדזשעטע אידישע נשמות וועלכע זענען ליידער דערווייטערט געווארן פון אידישקייט, זיי זאלן זוכה זיין זיך אומצוקערן לאבינו שבשמים.
ווי באקאנט איז דער בעלזא רבי שליט"א שטארק אקטיוו צו מקרב זיין אידישע קינדער לאביהם שבשמים, און האט דורכאויס די יארן מייסד געווען א רייע פעולות און ארגענעזאציעס צו מקרב זיין אט די אלע סארט אידן. נעכטן מיטוואך איז פארגעקומען א ספעציעלע אסיפה בקודש פנימה ביים רבי'ן מיט עטליכע רבני ודייני הקהילה, וואו מען האט דורכגעשמועסט ווייטערדיגע פלענער וויאזוי צו מוסיף זיין פעולות נשגבות צוריקצוברענגען פארבלאנדזשעטע נשמות צום טאטן אין הימל.
ביים אסיפה האט אויפגעטרעטן דער באקאנטער מגיד מישרים הגה"צ ר' מנשה ישראל רייזמאן שליט"א, און הגה"צ ר' פנחס פריעדמאן שליט"א ראש הכוללים ד'בעלזא, וועלכער האט איבערגעגעבן די פערזענליכע בקשה פונעם רבי'ן, א תקנה לדורות, אז יעדן ערב שבת זאל יעדער איינער מוסיף זיין נאך א ליכטעלע פאר די פארבלאנדזשעטע נשמות וואס זענען ליידער דערווייטערט פון אידישקייט, זיי זאלן זוכה זיין צו דערנענטערט ווערן אין א בחינה פון "נר מצוה ותורה אור". דער רבי שליט"א האט מוסיף געווען אז עס איז בכלל א גרויסער ענין צוצולייגן א ליכט, און ווער עס קען דאס אויספירן, און עס איז אים נישט צו שווער, וועט דאס זיין זייער א גוטע זאך.
