JDN

לפני מלכים יתיצב:

היינט דאנערשטאג וועלן כ"ק האדמורי"ם מסאטמאר, באבוב, וויזניץ פון מאנסי, הגאון הגדול רבי מלכיאל קאטלער שליט"א ראש ישיבה בית מדרש גבוה ד'לעיקוואד, און הגה"צ ר' אהרן מענדיל טווערסקי שליט"א בנו הגדול פון כ"ק אדמו"ר מסקווירא שליט"א, אנקומען אויף א מלכות'דיגע באזוך אין וואשינגטאן די סי, אויף אן אודיענץ מיטן הויכגעשעצטן פרעזידענט פון אמעריקע דאנאלד טראמפ, מיטן האפענונג צו קענען אויפטון למען הכלל והפרט, און זיך באדאנקן פאר זיינע פילע לייסטונגען לטובת כלל ישראל בעבר ובהווה.

שמחת בית טשערנאביל – צאנז: היינט קומט פאר די שמחת השבע ברכות פון א אייניקל ביי כ"ק אדמו"ר מטשערנאביל שליט"א, די חתן א זון פון זיין זון הגה"צ ר' משה יהושע טווערסקי שליט"א, איידעם ביי הגה"צ גאב"ד סאטמאר ב"פ שליט"א, מיט די כלה א טאכטער פון כ"ק אדמו"ר מצאנז סטעטן איילענד שליט"א, איידעם ביי כ"ק אדמו"ר מסטריזוב זצ"ל. – די שמחת השבע ברכות קומט פאר אין טשערנאבילער בית המדרש אין בארא פארק.

שמחת בית קאסאן – דעעש – קאמאדא: היינט קומט פאר די שמחת השבע ברכות פונעם חתן א זון פון הגה"צ ר' אברהם יחזקאל פריעדמאן שליט"א אדמו"ר מקאמאדא, איידעם ביי הגה"צ ר' יחיאל ישראל דאסקאל שליט"א, מיט די כלה א טאכטער פון הגה"צ ר' אברהם פאנעט שליט"א, זון פון כ"ק אדמו"ר מדעעש קרית יואל שליט"א, אייניקל פון כ"ק אדמו"ר מקאסאן שליט"א. – די שמחת השבע ברכות קומט פאר אין זאל פון ביהמ"ד ניקלשבורג אין מאנסי.

שמחת בית מודזיץ – זוועהיל – ביאלא: עס איז געשלאסן געווארן די שידוך פון א אייניקל ביי כ"ק אדמו"ר ממודזיץ שליט"א, די חתן א זון פון זיין זון הגה"צ ר' דוד דוב טאוב שליט"א אב"ד מודזיץ ביתר, איידעם ביי כ"ק אדמו"ר מזוועהיל ירושלים שליט"א, מיט די כלה א טאכטער פון הרב נתן נטע פאנעט שליט"א, זון פון הגה"צ ר' אהרן דוד פאנעט זצ"ל ראש כולל זיבענבערגן, און איידעם ביי כ"ק אדמו"ר מביאלא ישרי לב שליט"א.

שמחת בית סערדאהעלי – צאנז זוועהיל: עס איז געשלאסן געווארן די שידוך פון א אור אייניקל ביי כ"ק אדמו"ר מסערדאהעלי שליט"א, אייניקל פון זיין איידעם הגה"צ ר' חיים אלעזר מאנדלאוויטש שליט"א חבר ביד"ץ טארטיקוב, די חתן א זון פון זיין זון הרב יהושע מאנדלאוויטש שליט"א, איידעם ביי הגה"צ ר' אברהם סעקולא שליט"א אבד"ק סאדאוונא, מיט די כלה א טאכטער פון הגה"צ ר' יעקב ווידער שליט"א, זון פון הגה"צ אבד"ק לינז שליט"א, און איידעם ביי כ"ק אדמו"ר מצאנז זוועהיל שליט"א.

כ"ק אדמו"ר מדושינסקיא שליט"א קומט היינט אן אויף א תפילת רבים ביים מערת המכפלה אין חברון, אינאיינעם מיט די שותפים ותומכים פון מוסדות דושינסקיא בארה"ק.

כ"ק אדמו"ר מווערדאן שליט"א פון ב"פ וועט היינט אנקומען קיין מאנסי, און אפרעכטן די יארצייט טיש לרגל די הילולא קדישא פון זקינו הרה"ק רבי ישכר בערצי מסאטמאר זי"ע, אין שטוב פון הנגיד החסיד ר' דוד בצלאל ששון הי"ו, נאכן טיש וועט דער רבי שליט"א אויפנעמען דעם ציבור חסידים לקראת די הייליגע טעג הממשמשים ובאים.

הגה"צ ר' דניאל חיים אלתר שליט"א ראש ישיבת פני מנחם, קומט היינט אן אויף א ביקור חיזוק אין שטאט אנטווערפן, און וועט היינט דורכ'ן טאג אויפטרעטן מיט דרשות און שמועסן אין היכל ישיבת עץ חיים ווילרייק, אין ביהמ"ד זכרון בנימין אין שטאט, און אין ביהמ"ד המרכזי דחסידי בעלזא.

כ"ק אדמו"ר מוויזניץ שליט"א פון וויליאמסבורג קומט היינט אן קיין מאנסי, אויפצונעמען דעם ציבור חסידים לקראת די הייליגע טעג, אין שטוב פון הנגיד החסיד ר' הערשיל גרינבוים הי"ו.