א שרעקליכע בזיון קברי ישראל וואס איז געלאזט געווארן אין גאנג נעבן די אלטע בית החיים אין שטאט קאזשניץ אין פוילין, איז מיט גרויס נסים און סייעתא דשמיא אפגעשטעלט געווארן אין די ריכטיגע מינוט, מיט די באמיענדע השתדלות פון וועד הכנסת אורחים ד'קאזשניץ, אין שפיץ פון העסקן ר' עשהאל שחף הי"ו.
ביים בית החיים אין שטאט קאזשניץ ליגן באערדיגט פילע הייליגע צדיקים, ובראשם דער הייליגער קאזשניצער מגיד זי"ע בעל עבודת ישראל, וצאצאיו הקדושים, און נאך פילע אידן וואס זענען נטמן געווארן אויפן בית עלמין דורכאויס די יארן. א שטיק צייט צוריק האט מען שוין דורכגעפירט וויכטיגע פעולות און אהערגעשטעלט א צוים ארום די בית החיים, אבער מיט דעם אלעם האט מען געוואוסט אז אויך אינדרויסן פונעם צוים איז פארהאן אידישע קברים אן קיין קלארקייט דערויף.
היינט איז איינער פון די עסקנים וואס איז עוסק אפצוהיטן מורשת היהודית אין אייראפע, מר. מאיר בולקה, פונקט אנגעקומען אויפן ארט וועלנדיג דערגיין די קלארקייט ארום די דרויסענדיגע קברים, אבער צו זיין שטוינונג האט ער געזעהן ווי עס ווערט דורכגעפירט גראב ארבעט אויפן פלאץ, נישט ווייט פונעם צוים וואס נעמט ארום די בית החיים, און גאר שאקירנד איז געווען זעענדיג מענטשליכע ביינער זיך וואלגערן אויפן פלאץ רח"ל.
נאכן זיך פארבינדן מיט די עסקני הוועד וואס שטייט בנשיאות כ"ק אדמו"ר מקאזשניץ שליט"א, האט דער יושב ראש וועד הכנסת אורחים ר' עשהאל שחף הי"ו זיך באלד פארבינדן מיטן הויפט רב פון פוילין הרב מיכאל שודריך הי"ו, וועלכער האט געפועל'ט ביי די ארטיגע באאמטע אז די ארבעט זאל זיך אפשטעלן קודם אויף דערווייל, בהוראת הקודש פונעם רבי'ן זענען די עסקנים באלד ארויסגעפארן קיין קאזשניץ צו פארזיכערן די עתיד פונעם פלאץ, עס זאל חלילה נישט צוקומען צו קיין בזיון קברי ישראל.
דער יו"ר וועד הכנסת אורחים פון קאזשניץ ר' עשהאל שחף הי"ו וועלכער איז באלד ארויסגעפארן קיין קאזשניץ, זאגט אז עס האט פאסירט א גרויסע נס אז מען איז אזוי שנעל געוואויר געווארן דערפון און עס ב"ה געקענט אפשטעלן, מיט א ספעציעלן דאנק פאר הרב שודריך דער הויפט רב פון פוילין, וואס פירט אן די וועד הפיקוח אויף בתי עלמין אין פוילין.
