היסטארישע מאמענטן האט זיך היינט אפגעשפילט אין כלל ישראל'ס היסטאריע, ווען אין א זעלטענע פארנעם איז פארגעקומען א זיצונג צווישן א צאל גדולי האדמורי"ם והרבנים אין די פאראייניגטע שטאטן, אינאיינעם מיטן הויכגעשעצטן פרעזידענט פון אמעריקע דאנאלד טראמפ, וועלכער האט איינגעלאדנט די חשובע געסט צו קומען אויף א באזוך צום ווייסן הויז.
נאך העפטיגע צוגרייטונגען און באראטונגען צווישן די גדולי האדמורי"ם והרבנים, די מקורבים און עסקנים בחצרות הקודש, טעטיגע עסקנים פאר אידן אין אלע שטעט, און די הויכראנגיגע באאמטע אין די טראמפ אדמיניסטראציע, איז היינט ענדליך צושטאנד געקומען דעם היסטארישן זיצונג, ווען א חשובע דעלעגאציע פון מנהיגי יהדות החרדית, כ"ק האדמורי"ם מסאטמאר, באבוב, וויזניץ פון מאנסי, הגאון הגדול רבי מלכיאל קאטלער שליט"א ראש ישיבה בית מדרש גבוה, און הגה"צ ר' אהרן מענדיל טווערסקי שליט"א בשליחות אביו הגדול דער סקווירא רבי שליט"א, האבן געהאט די געלעגנהייט צו זיצן מיטן פרעזידענט פאר א מלכות'דיגע באזוך, זייענדיג דאס ערשטע מאל אין זעקס און דרייסיג יאר וואס א אמטירנדע אמעריקאנער פרעזידענט טרעפט זיך מיט א דעלעגאציע פון אדמורי"ם ורבנים, זינט די היסטארישע באגעגעניש פון פרעזידענט קארטער, מיט כ"ק האדמורי"ם מסאטמאר, באבוב, און וויזניץ זצ"ל.
אין די פארמיטאג שעות האבן די חשובע אדמורי"ם אפגערייזט קיין וואשינגטאן מיט פריוואטע פליגערס, צוליב פארשפעטיגונגען מיט די פליגערס איז די באזוך אויך געווארן אפגעשטופט מיט א קורצע צייט. ארום צוויי אזייגער זענען שוין אלע רבי'ס און רבנים געווען אנוועזנד אין ווייסן הויז, וואו זיי זענען גאר ווארעם באגריסט געווארן דורך די פרעזידענטליכע פארשטייער, און זענען געזעצט געווארן בכבוד הראוי ארום דעם טיש אין די רוזעוועלט צימער, אויף א זיצונג מיט די הויכראנגיגע אדמיניסטראציע באאמטע.
ביים ערשטן זיצונג, זענען געווען אנוועזנד דער וויצע פרעזידענט דזשעי די ווענס, און דער אידישער איידעם פון פרעזידענט טראמפ דזשערעד קושנער. א לענגערע צייט האט מען דורכגעשמועסט פארשידענע נושאים העומדים על הפרק, צווישן זיי די פארצווייגטע פעולות צו העלפן קינדערלאזע פארפעלקער, און העלפן פאמיליעס מיט זרע של קיימא, וואס איז ווי באקאנט א שטארקע פריאריטעט ביי די טראמפ אדמיניסטראציע.
צווישן אנדערע האבן אויפגעטרעטן ביים ערשטן זיצונג, די חשובע אדמורי"ם שליט"א און זייערע קינדער, הגה"צ אבד"ק סאטמאר וומס"ב שליט"א, הגה"צ אבד"ק סיגעט שליט"א, העסקן ר' יוסף געשטעטנער הי"ו, העסקן ר' יואל ראזענפעלד הי"ו מגדולי העסקנים בחצר הקודש באבוב, העסקן ר' ישראל משה שפיטצער הי"ו מעיאר פון שיכון סקווירא, העסקן ר' משה דוד נידערמאן הי"ו מגדולי העסקנים בחצר הקודש סאטמאר, העסקן ר' גדלי' סעגעדין הי"ו פון קרית יואל, העסקן ר' יודא לייב זארגער הי"ו ווילעדזש טראסטי אין עירמאונט, און העסקן ר' משה מארגארעטען הי"ו פון די צדק ארגענעזאציע.
דערנאך איז כ"ק אדמו"ר מסאטמאר שליט"א על ישראל הדרתו אין קרית יואל, אריין אויף א קורצע פריוואטע זיצונג מיטן פרעזידענט, און נאך עטליכע מינוט זענען אלע אדמורי"ם ורבנים אריין אין אוועל אפיס צום היסטארישן זיצונג.
דער עלטסטער רבי פון די חשובע דעלעגאציע כ"ק אדמו"ר מסאטמאר שליט"א, האט פארגעזאגט די תפילה "הנותן תשועה למלכים", און העסקן ר' גדלי' סעגעדין הי"ו האט עס איבערגעטייטשט אין ענגליש. דערנאך האט מען זיך אוועקגעזעצט אויף די צוגעגרייטע בענקלעך, וואו מען האט פאר קרוב צו א האלבע שעה אדרעסירט די היסטארישע באגעגעניש, ארויסגעהויבן און געדאנקט דעם פרעזידענט פאר זיינע ווייטגרייכנדע פעולות פארן אמעריקאנעם פאלק און פאר כלל ישראל בפרט.
דער רעפאבליקאנער קאנגרעסמאן מייק לאולער וואס פארטרעט ראקלענד קאונטי האט באגריסט די חשובע דעלעגאציע, עס האט אויפגעטרעטן העסקן ר' גדלי' סעגעדין הי"ו פון קרית יואל, הגה"צ ר' אהרן מענדיל טווערסקי שליט"א האט פארגעליינט א בריוו פון אביו הגדול כ"ק אדמו"ר מסקווירא שליט"א, וואס האט געשיקט דעם בריוו פארן פרעזידענט, און זיך אנטשולדיגט פארן נישט קענען אליינס זיך באטייליגן.
דערנאך האבן אויפגעטרעטן מיט קורצע ווערטער כ"ק האדמורי"ם מסאטמאר שליט"א, און צווישן אנדערע איז אדרעסירט געווארן פארשידענע ענינים העומדים על הפרק, די גזירת החינוך אין ניו יארק, די אויפשטייג פון אנטיסעמיטיזם, די ווייטאגליכע שטימונג ביי אידישע ארעסטאנטן, און נאך פארשידענע זאכן. נאכן אויסטוישן פארשידענע פראגן האבן די אדמורי"ם ווארעם געוואונטשן דעם פרעזידענט פיל הצלחה און סייעתא דשמיא, דער פרעזידענט האט געשאנקען פאר די אנוועזנדע רבנים ספעציעלע מטבעות, און דערנאך זענען זיי געווארן ארויסבאגלייט דורך די ארטיגע באאמטע.
א גאר מערקווירדיגע מאמענט האט זיך אפגעשפילט איידער די היסטארישע זיצונג, ווען די צוויי ברידער כ"ק האדמורי"ם מסאטמאר שליט"א האבן זיך ווארעם באגריסט און זיך געוואונטשן איש את רעהו, דערביי האט דער סאטמארער רבי שליט"א געוואונטשן מזל טוב פארן ברודער דער סאטמארער רבי לרגל די חתונה פון א אייניקל, און די שידוך פון א אייניקל וואס איז געשלאסן געווארן די נאכט.
נאך א מערקווירדיגע אנעקדאט האט זיך אפגעשפילט ווען כ"ק אדמו"ר מבאבוב שליט"א איז געווען אונטערוועגנס פונעם לופטפעלד צום ווייסן הויז, זייענדיג אין קאר האט דער רבי געבעטן פון די אנוועזנדע מקורבים צו זינגען דעם ניגון ותערב לפניך עתירתינו, ושם נעבדך ביראה כימי עולם, זאגענדיג אז ווען מ'זעהט דעם עיר הבירה פון די אומות העולם, דארף מען געדענקן פון ירושלים עיר הקודש.
