די באקאנטע "ווילחאוויץ זאל" וואס געפונט זיך אינעם בנין פון תלמוד תורה מאור החיים וויזניץ בנין ווילחאוויץ אין מאנסי, גייט אין די יעצטיגע טעג אריבער א רענאוואציע פראיעקט, און די נאמען פון די זאל וועט געטוישט ווערן צו "אולם ווערדיגער", נאך וואס הנגיד החסיד ר' שלמה ווערדיגער הי"ו האט אפגעקויפט דעם זכות שם האולם.
די באקאנטע חתונה זאל איז שוין פאר צענדליגע יארן א בית חתנות, וואו אידישע קינדער רעכטן אפ זייערע שמחות בעידן חדוותא, לבנות בית נאמן בישראל, צענדליגע יארן איז עס געווען באקאנט אלס די חתונה זאל פון ישיבה ספרינג וואלי, און מיט דרייצן יאר צוריק נאך וואס די וויזניצע מוסדות האט אפגעקויפט דעם בנין, איז עס באקאנט געווארן מיטן נייע נאמען "ווילחאוויץ".
מיטן אפקויף פון די געביידע פאר די וויזניצע מוסדות, האט הנגיד ר' שלמה ברוך קעסט ע"ה פון לאס אנדזשעלעס, יליד עיר ווילחאוויץ, אפגעקויפט דעם זכות שם הבנין, אויפן נאמען פון זיין היימשטאט "ווילחאוויץ", די זאל אבער האט נישט באקומען קיין אייגענע נאמען, און דעריבער האט מען עס גערופן "אולם ווילחאוויץ", אלס די חתונה זאל אין די וויזניצע תלמוד תורה געביידע "בנין ווילחאוויץ".
אצינד איז די זכות שם האולם געווארן אפגעקויפט דורך הרבני הנגיד ר' שלמה ווערדיגער הי"ו יו"ר אגודת ישראל בארה"ב, פארן פאנטאסטישן סומע פון איין און א האלב מיליאן דאללער, דורכאויס א באזוך וואס ר' שלמה האט אפגעהאלטן בביתו נאוה קודש פון כ"ק אדמו"ר מוויזניץ שליט"א פון מאנסי.
דעם מאנטאג איז פארגעקומען א ספעציעלע מסיבת לחיים צום קנין זכות, מיט די באטייליגונג פונעם נדיב ר' שלמה ומשפחתו, און די ראשי העסקנים אין די וויזניצע מוסדות, די מעמד איז פארגעקומען אינעם פארצימער פון די פראכטפולע זאל "אולם ווערדיגער".
אין די יעצטיגע טעג ווערן געמאכט רענאוואציע ארבעט ביים אריינגאנג צום זאל, וואו עס ווערט הערליך איבערגעפרישט און איבערגעבויעט אויף א פראכטפולע פארנעם, ווען עס קומט נישט פאר קיין חתונות אין די יעצטיגע ימים טובים סעזאן, און צום פרישן חתונה סעזאן שנת תשפ"ז וועט די נאמען פון די זאל געטוישט ווערן צו "אולם ווערדיגער".
