אין די צייט וואס כלל ישראל איז פארנומען איבער די שרעקליכע קריזיס מיט הויכע אסטראנאמישע קאסטן ווען עס קומט צו חתונה מאכן, און מערערע ארגענעזאציעס און פרואוון ווערן אוועקגעשטעלט מיטן האפענונג צו פארגרינגערן פאר מחותנים בעת שמחתם, איז די וויזניצע מוסדות אין מאנסי ארויסגעקומען אצינד מיט א גאר פרייליכע מעלדונג איבער די עפענונג פון א נייע חתונה זאל וואו מען וועט קענען חתונה מאכן פאר שפאט ביליג, פאר בלויז פינף טויזענט דאללער א צד!
דאס קומט נאכדעם וואס אין די לעצטע פאר יאר איז דורכגעפירט געווארן פארשידענע שריט אינערהאלב די וויזניצע קהילה אין ראם פון די "מצא טוב" רעוואלוציע, מיטן ציהל ארויסצוהעלפן די מחותנים בעת שמחתם, צו קענען חתונה מאכן פאר פיל ביליגער ווי איינגעוואוינט, און אצינד גייענדיג מחיל אל חיל איז די וויזניצע מוסדות ארויסגעקומען מיט דעם באגריסנדן שריט צו דראסטיש דערלייכטערן די הוצאות החתונה, מיטן אהערשטעלן א פאסיגע חתונה זאל פאר שפאט ביליג, אזעלכע נומערן וואס איז א זעלטנהייט היינטיגע טעג.
די נייע חתונה זאל ווערט אהערגעשטעלט אין די בניני המוסדות פון די מיידל שולע אויף קרעסט קאורט, הארט נעבן די באקאנטע תפארת עלקא זאל וואס איז זינט איר עפענונג מיט בלויז צוויי יאר צוריק אויסגעשטיגן אלס א סטראטעגישע אכסניא של שמחה פאר הונדערטער חתונות מדי יום ביומו.
די מענער זאל וועט זיין קוואטירט אין די בנות ישראל אודיטוריום, וואס פלעגט ביז עטליכע יאר צוריק דינען אלס די אור החיים חתונה זאל, און די פרויען זאל וועט זיין קוואטירט הארט דערנעבן, אין די אודיטוריום פון די בית קילא בנין, וואס דינט אלס הויפטקוואטיר פאר די וויזניצע הויך שולע די לעצטע צוואנציג יאר.
די נייע זאל "אולם איינהארן" ווערט ערמעגליכט פאר דעם דראסטישן אונטערנעמונג, מיטן הילף פון הנגיד החסיד ר' יחזקאל אביגדור איינהארן הי"ו בריח התיכון פון די וויזניצע מוסדות אין מאנסי, וועלכער האט זיך שוין געלאזט קאסטן שווערע מיליאנען להחזקת המוסדות און אויפבויען די בנינים אדירים ועוד ידו נטויה.
יעצט נאך יו"ט פסח וועט מען אנהייבן צו באשטעלן שמחות אין דעם נייעם זאל, וואס איז ערווארטעט זיך צו עפענען קומענדיגן חודש כסלו הבעל"ט, און פאר בלויז פינף טויזענט דאללער א זייט, מיט א פאראייניגטע פרייז פון צען טויזענט דאללער פאר א חתונה נאכט, וועט ווערן צוגעשטעלט אלע באדערפענישן וואס ווערט אריינגערעכנט, מוזיק און דאס גלייכן.
