דעם מוצאי שבת קודש נאך שלש סעודות אין ביהמ"ד הגדול אין קרית וויזניץ בני ברק, האט דער לעגענדארער משמש בקודש ביים רבי'ן הרב שאול גרינבערגער שליט"א אויפגעטרעטן מיט א דרשה פאר די טויזענטער חסידים, איבערגעבענדיג פקודת הקודש פונעם רבי'ן אז פון היינט אן זאלן אלע חתונות ביי וויזניצע חסידים זיין אונטער די השגחה לעניני נגינה פון וועד "יזמרו לשמך" וואס שטייט אונטער דעם בית דין הגדול שבירושלים העדה החרדית.
דער וויזניצער רבי שליט"א וועלכער האלט זיך אויף דורכאויס די יעצטיגע וואכן אויף אפרוה אין מושב אורה נעבן ירושלים עיה"ק, איז פארגאנגענעם שבת אריינגעקומען קיין קרית וויזניץ ב"ב פראווענען דעם שבת בקרב חסידיו, מוצאי שבת נאך שלש סעודות האט דער משמש בקודש הרב שאול גרינבערגער שליט"א אויסגערופן די הכרזה בשליחות ובפקודת הקודש פונעם רבי'ן.
דער משב"ק האט דערציילט אז מיט עטליכע טעג צוריק האט כ"ק אדמו"ר מסקולען שליט"א פון ירושלים באזוכט ביים רבי'ן, און געבעטן פונעם רבי'ן צו מעורר זיין דעם ציבור איבער די ענין פון חסידישע נגינה ביי חתונות, נאך וואס ביי פארשידענע קרייזן איז עס ליידער נפרץ געווארן און די געטענץ זעהט אויס זייער נישט היימיש מיט אלגעמיינע ניגונים.
דערביי האט דער משב"ק געזאגט אז דער רבי האט געהייסן איבערגעבן פארן גאנצן ציבור, אז אלע חתונות וואס קומען פאר צווישן וויזניצע חסידים זאלן האבן די השגחה פון וועד "יזמרו לשמך", וואס האט שוין אויפגעטון גדולות ונצורות אין דעם געביט, אונטער די כסדר'דיגע הדרכה פון די שרי התורה חברי ביד"ץ העדה החרדית.
