חסידי וויזניץ אין בארא פארק קוקן זיך צו מיט גרויס פרייד צו די געוואלדיגע הרחבת גבולי הקדושה, ווען אין א מזל'דיגע שעה איז אין די יעצטיגע טעג באנייעט געווארן די הערליכע נייע געביידע פון "בנות מרגליא וויזניץ", וואס איז געבויעט געווארן מיט גרויס פלייס אין א קארגע צייט אפשניט פון ווייניגער ווי צוויי יאר.
די נייע פראכטפולע געביידע פון ניין שטאק איז געבויעט געווארן אויף א גרויסן שטח אויף די איין און פערציגסטע סטריט, הארט נעבן די עקזיסטירנדע געביידע פון בנות מרגליא, וואס איז שוין פון לאנג אויסגעוואקסן איר געברויך. די נייע געביידע נעמט אריין פערציג טויזענט סקווער פיס, צוויי שטאק אונטער די ערד און זיבן שטאק העכער די ערד. צוואנציג נייע לופטיגע קלאס צימערן, א גרויסע דאווענען שטוב און א ריזן אודיטוריום, אלס א רחבות'דיגע אכסניא פאר די הויעך שולע און פרי סקול, ווען די ביז יעצטיגע געביידע ווערט פארברייטערט פאר די עלעמענטרי קלאסן.
זינט די מעמד הנחת אבן הפינה אין די ימי הרחמים והסליחות פון תשפ"ה, איז די בוי ארבעט אנגעגאנגען אויף א העפטיגע פארנעם, און אצינד צום נייעם לערן יאר וואס האט זיך אנגעהויבן מיטן רעכטן פוס אין די יעצטיגע טעג, איז די פראכטפולע בנין באנייעט געווארן מיט די הונדערטער תלמידות בליעה"ר.
קומענדיגע וואך דינסטאג, די צווייטע טאג פון עשרת ימי תשובה, וועט פארקומען א גרויסע מעמד קביעת מזוזה און חנוכת הבית ברוב פאר והדר, אין שפיץ פון כ"ק אדמו"ר מוויזניץ שליט"א פון בארא פארק נשיא המוסדות, מיט די באטייליגונג פון הונדערטער חסידים והורי המוסדות.
