תלמידי וחסידי וויען זענען איבערראשט געווארן מיט די פרייליכע מודעה איבער די הרחבת גבולי הקדושה, ווען די הנהלת המוסדות גרייט זיך אין די טעג אריינצושפרינגען אין א ערנסטע פראיעקט אויפצובויען א שפאגל נייע געביידע אין די מתיבתא קעמפ אין לאק שעלדרעיק, וואס וועט דינען אלס דארמיטארי געביידע פאר די חשובע בחורים תלמידי המתיבתא.
די נויט פאר א נייע געביידע זעהט זיך שוין אן א שטיק צייט, ווען די צאל תלמידים איז שטארק געוואקסן אין די לעצטע פאר יאר, און כדי צו האבן פלאץ פאר אלע בחורים האט מען געמאכט פראוועזארישע דארמיטארי שטובער אין די חדרי השיעורים, און מיט דעם אלעם איז עס נישט נאכגעקומען די נאכאנאנדע וואוקס בליעה"ר. די נייע דארמיטארי געביידע וועט זיין געווידמעט אלס געשמאקע אכסניא פאר די הונדערטער בחורים צו שלאפן, דורכאויס די זוממער וואכן ווען די בחורים וויילן אין קעמפ, מחנה מתיבתא נחלת יעקב וויען אין לאק שעלדרעיק.
קומענדיגע וואך זונטאג פרשת כי תבוא וועט בעז"ה פארקומען א גרויסע מעמד הנחת אבן הפינה אויפן שטח הבניה, אין שפיץ פון כ"ק אדמו"ר מוויען שליט"א, און אצינד ווערן אויסגעארבעט די לעצטע פונקטליכע פלענער פאר די בוי פראיעקט, מיטן האפענונג אז עס זאל שוין זיין גרייט צום קומענדיגן זוממער סעזאן תשפ"ז.
