תלמידי וחסידי וויען גרייטן זיך אין די יעצטיגע טעג צו א פרייליכע מעמד הנחת אבן הפינה, ווען עס וועט געלייגט ווערן די גרונדשטיין פאר א נייע בנין בית חינוך לבנות "בנות חנה וויען" אין שטאט מאנסי, א בנין אדיר ומפואר וואס וועט בעז"ה צוברענגען גרויס הרחבת הדעת פאר די הונדערטער תלמידות בליעה"ר.
די מיידל שולע איז געעפנט געווארן מיט צוועלף יאר צוריק, און טראגט דעם נאמען בנות חנה, לשמה ולזכרה פון הרבנית הצדיקת מסאמבאטהעלי ע"ה, אמה של מלכות פון כ"ק אדמו"ר מוויען שליט"א. אין לויף פון די יארן זענען די צאל תלמידות שטארק נתרבה געווארן בליעה"ר מיט א כתר שם טוב, און עס האט זיך אויסגעפעלט אהערצושטעלן א פולשטענדיגע בנין פאר די מוסדות וואו די תלמידות זאלן קענען לערנען און פארברענגען מיט הרחבת הדעת.
אצינד גרייט מען זיך צופ אויפבוי פון די נייע בנין וואס וועט געבויעט ווערן אויף הייוויו ראוד נעבן קאלעדזש ראוד, א בנין אדיר ומפואר פון עטליכע שטאק, וואס וועט פארמאגן צענדליגע קלאס צימערן, א ריזן עס זאל, און אלס וואס פעלט זיך אויס פאר א פולשטענדיגע בנין המוסדות. די מעמד הנחת אבן הפינה איז באשטימט פארצוקומען קומענדיגן זונטאג פרשת וירא הבעל"ט, אין שפיץ פונעם נשיא המוסדות כ"ק אדמו"ר מוויען שליט"א.
