תלמידי וחסידי טאהש זענען ארומגענומען מיט רגשי הרחבה והרווחה, ווען אין די יעצטיגע וואכן איז די הנהלה פון מוסדות טאהש אין מאנסי אריין אין קאנטראקט אויף א בנין רחבת ידים און א גרויסע שטח אינעם עיר התורה והחסידות מאנסי, וואס וועט פארוואנדלט ווערן אלס אכסניא של תורה פאר די בליענדע תלמוד תורה "עבודת משולם פייש ד'טאהש" אין שטאט.
עטליכע יאר איז פארביי זינט די התייסדות התלמוד תורה, און ביז יעצט האט מען גענוצט א געדונגענע לאקאל, ווען יעדעס יאר איז די גבולי הקדושה נתרבה געווארן מיט נאך תלמידים בליעה"ר לשם ולתפארת. זעענדיג די אומאויפהערליכע בליה און וואוקס איז די הנהלת הת"ת אריינגעשפרינגען אין א פראיעקט אפירצוזוכן א פאסיגע אכסנית קבע וואו די תלמוד תורה זאל קענען ווערן איינקוואטירט פאר לאנגע יארן בעז"ה.
מיט גרויס סייעתא דשמיא האט מען געפונען א פאסיגע לאקאל אויף די הייוויו גאס, א בנין רחבת ידים מיט א גרויסע שטח ארום, די בנין פארמאגט דריי שטאק מיט ברייטע און לופטיגע קלאס צימערן, א גרויסע היכל בית המדרש און א חדר אוכל, און נאך פארשידענע איינריכטונגען לרווחת התלמידים און די הנהלה.
בברכתו ובעידודו פון כ"ק אדמו"ר מטאהש שליט"א איז מען אריינגעשפרינגען אינעם מקח בכי טוב, מיטן האפענונג צו קענען אין די נאנטע צוקונפט לברך על המוגמר און מחנך זיין דעם בנין התלמוד תורה ברוב פאר והדר.
