תושבי מאנטריאל און תלמידי וחסידי סאטמאר בפרט גרייטן זיך אין די טעג צום באנייאונג פון א שפאגל נייע חתונה זאל, ווען צום ערשטן מאל בקורות יהדות מאנטריאל ווערט אהערגעשטעלט א אידישע חתונה זאל אין הארץ פון די אידישע געגנט, נאך וואס ביז היינט האט מען געדארפט ארויספארן פון געגנט צו פראווענען די חתונות אין דרויסענדיגע זאלן.
די נייע זאל "עטרת רישא" איז סטאנציאנירט אין די פראכטפולע בנין פון בית אסתר ד'סאטמאר וואס איז באנייעט געווארן מיט עטליכע יאר צוריק, און איז נתנדב געווארן דורך הרבני הנגיד ר' משה נפתלי הירצקא פריעדמאן הי"ו. אין די לעצטע תקופה איז אנגעגאנגען העפטיגע בוי ארבעט אהערצושטעלן דעם חתונה זאל מיט גרויס פראכט ווי עס פאסט פאר אידישע פרייליכע שמחות, און אצינד איז מען זוכה לברך על המוגמר, ווען דעם קומענדיגן מאנטאג ראש חודש חשון וועט געפראוועט ווערן די ערשטע חתונה אינעם נייעם זאל.
