גאר פרייליכע נייעס ווערט פארשפרייט אצינד מיט אומגעהויערע פרייד צווישן אלפי חסידי בעלזא איבער די וועלט, אז עס איז געבוירן געווארן די ערשטע יונגל ביי הרה"ג ר' שלום רוקח שליט"א, עלטסטע זון פון הגה"צ ר' אהרן מרדכי רוקח שליט"א, און עלטסטער אייניקל פונעם רועה נאמן כ"ק אדמו"ר מבעלזא שליט"א.
די פרייליכע שמחה ברענגט אויף גרויס שמחה והתרגשות ביי אלע חסידים, זעענדיג ווי די גאלדענע קייט ציהט זיך ווייטער לשם ולתפארת, שטייענדיג שוין פערצן יאר זינט די היסטארישע חתונה בחצר הקודש בעלזא, ווען זינט דאן האט דער גרויסער בעל שמחה הרה"ג ר' שלום שליט"א געבוירן זעקס מיידלעך, ביז צום יעצטיגן שמחה מיט די געבורט פון זיין ערשטן בן זכר.
די שמחה קומט אין א גרויסן טאג, ביומא דהילולא קדישא פונעם פריערדיגן רב הרה"ק מהרי"ד מבעלזא זי"ע, מיט א תפילה אז די שמחה זאל ברענגען ישועות ורפואות פארן גאנצן ציבור חסידים, ובפרט פארן ראש בית אב כ"ק אדמו"ר מבעלזא שליט"א, יתחדש כנשר נעוריו בבריות גופא ונהורא מעליא, דער רבי זאל נאך קענען לאנגע יארן משפיע זיין אויף עדת צאן מרעיתו, און באשיינען די שמחות ברוב עם הדרת מלך.
