א שווערע בשורה ווערט פארשפרייט אצינד איבער די הסתלקות פון כ"ק אדמו"ר מדזירקא זכר צדיק לברכה, הרה"צ רבי אהרן בריזל זצ"ל, וועלכער האט אנגעפירט זיין שיינעם הויף אינעם עיר ואם בישראל בארא פארק, און משפיע געווען פאר אידישע קינדער תורה וחסידות כיד ה' הטובה עליו. ליידער איז דער רבי זצ"ל נישט געווען געזונט די לעצטע תקופה, און איז יעצט מאנטאג חול המועד נתבקש געווארן לישיבה של מעלה, אין עלטער פון דריי און זיבעציג יאר.
דער רבי זצ"ל איז געבוירן געווארן כ"ז ניסן תשי"ג צו זיין פאטער הגאון החסיד ר' פנחס בריזל זצ"ל, וועלכער האט געשטאמט פון די גאר חשובע מיוחס'דיגע משפחת בריזל מיקירי קרתא דשופריא. אויפגעוואקסן איז ער אין די הייליגע ירושלימער געסאלעך, וואו ער האט זיך געווייקט ביי די פריערדיגע און פארצייטישע חסידים, ער איז געווען א נאנטער תלמיד פון כ"ק אדמו"ר רבי ברוך שלום אשלג זצ"ל צו וועם ער איז געווען אדוק ומקושר כל ימי חייו, און שטענדיג האט ער זיך געקאכט אין די תורה וואס ער האט מקבל געווען פון זיין גרויסן רבי'ן.
זייענדיג א חשובער משפיע מיט א אוצר בלום בתורה וחסידות, האט דער רבי זצ"ל אוועקגעשטעלט דעם שיינעם דזירקא הויף וואו ער האט משפיע געווען פאר אידישע קינדער ברוחניות ובגשמיות, זיין בית המדרש אין ירושלים עיה"ק איז בליץ שנעל פארוואנדלט געווארן אין א תל תלפיות וואו פילע אידן האבן געפונען א ווארעמע ווינקל, און גענאסן פון א גרויס קירבה ביים רבי'ן, סיי ברוחניות נהנה צו זיין פון די ווארעמע תפילות און טישן, און סיי בגשמיות ווען דער רבי האט צוגעשטעלט א ברייטע הכנסת אורחים אויף א זעלטן שטארקע פארנעם, וואו הונדערטער אידן האבן זיך געזעטיגט מדי יום ביומו ומדי שבת בשבתו, און באקומען דעם ווארעמען געפיל פונעם רבי'ן.
דורכאויס די יארן האט דער רבי אויך מייסד געווען בית מדרשו אין בארא פארק, און זיך עווענטועל אריבערגעצויגן וואוינען קיין בארא פארק, דער רבי האט אנגעהאלטן ביידע בתי מדרשים סיי אין בארא פארק און סיי אין ירושלים און כסדר משפיע געווען אויף די חסידים מרחוק ומקרוב, פארטיילט גאר אסאך ביד רחבה וברוח נדיבה, און פארגעלערנט טיפזיניגע שיעורים בתורת החסידות והקבלה, אויפן וועג וואס ער האט מקבל געווען פון זיין גרויסן רבי'ן.
ליידער האט דער רבי זיך געמוטשעט די לעצטערע חדשים מיט פארשידענע געזונטהייט קאמפליקאציעס, און דעם יו"ט סוכות האט מען אריינגעפירט דעם רבי'ן אין שפיטאל אין א קריטישע צושטאנד. היינט מאנטאג חול המועד פארמיטאג האט דער רבי צוריקגעגעבן זיין ריינע נשמה ליוצרה, צום טיפן צער פון פילע תלמידים וחסידים וכל בית ישראל.
די מסע הלוויה וועט ארויסגיין היינט מאנטאג חול המועד דריי דרייסיג נאכמיטאג, מהיכל בית מדרשו אויף דיטמעס עוועניו אין בארא פארק, אויפן וועג צום בית החיים הר שלום אין מאנסי וואו דער רבי זצ"ל וועט קומען לקבורה.
וכל בית ישראל יבכו את השריפה אשר שרף ה'.
