דרכי ציון אבילות, די ירושלימער גאסן זענען פארטרויערט און פאריתומ'ט, שטייענדיג נאך א גרויסע לוויה ווען טויזענטער אידן האבן באגלייט אחר מיטתו פון אחד המיוחד מגדולי ירושלים של מעלה, כ"ק אדמו"ר מפאריסוב הרה"ק רבי חנני' יוסף עקיבא ראבינאוויטש זכר צדיק וקדוש לברכה, וועלכער איז נפטר געווארן דעם שבת קודש באשמורת הבוקר, בהאי קטירא איתקטיר, בשיבה טובה אין עלטער פון פינף און אכציג יאר.
דער רבי זכר צדיק לברכה איז געווען דער צווייטער זון פון הגה"צ המקובל רבי בנימין ראבינאוויטש זצ"ל מייסד קהילה קדושה משכנות הרועים, וחבר ביד"ץ העדה החרדית, אן אייניקל בן אחר בן ביז צום הייליגן יו"ד הקדוש פון פשיסחא זי"ע, און א איידעם ביי הגאון החסיד ר' שלמה צבי אטיק ז"ל מיקירי קרתא דשופריא.
דער רבי איז געווען פון די גאר חשובע מנהיגי ישראל, געפירט אן עדה קדושה אין ירושלים עיר הקודש אויפן פארצייטישן שטייגער, לזכר נשמת אבותיו הקדושים די זיידעס לבית פאריסוב ולמעלה בקודש, דער רבי איז געווען באקאנט מיט זיין צדקות ופרישות, געלעבט א העכערע לעבן אן קיין שייכות צום עולם הזה, געהארעוועט אין לערנען בנגלה ובנסתר, ממשיך געווען דעם שיינעם דרך פון מורו ורבו הגאון החסיד ר' אשר פריינד זצ"ל, און אוועקגעמאכט דעם זיך אין יעדן געלעגנהייט, זייענדיג עולה ומתגבש אויפן סולם העולה בית קל.
דער רבי איז געווען א באקאנטע ריז בעולם הקבלה, ער פלעגט פארלערנען שיעורים תמידין כסדרן, און אנגעהאלטן א נאנטע קשר מיט די גדולי המקובלים, זייענדיג עוסק ברזי דרזין באש להבת שלהבת. די עבודת הקודש פונעם רבי'ן ביים דאווענען און בכלל דורכאויס פיר און צוואנציג שעה אין טאג איז געווען א שם דבר, און אסאך האבן אנגעצייגט אויף דעם צדיק וקדוש צו זיך אפלערנען פון אים אין גיין אין די דאזיגע וועגן בקדושה של מעלה.
עשרה בטבת תרצ"ט איז דער רבי זצ"ל געבוירן געווארן אין ירושלים עיה"ק, אלס קינד האט ער געלערנט אין תלמוד תורה עץ חיים אין ירושלים, אינאיינעם מיט אחיו הגדול כ"ק אדמו"ר ממשכנות הרועים שליט"א, וועלכע האבן זיך געהאלטן אלע יארן גאר נאנט בקשר עליון דאורייתא. דער רבי איז געווען א תלמיד מובהק פון הגה"ק בעל חלקת יהושע מביאלא זצ"ל, און שוין אלס אינגערמאן געווען באקאנט אלס א זעלטענע משפיע דערהייבענדיג תלמידים בחורים און אינגעלייט צו עבודת השם יתברך.
די הסתלקות פונעם רבי'ן זצ"ל איז א טיפע אבידה פארן גאנצן דור, ירושלים של מעלה נאכמער, און פערזענליך פאר עדת צאן מרעיתו, די נאנטע מקורבים וואס האבן זיך געקלאמערט לאורו, און די נאנטע משפחה וואס האבן נהנה געווען מאורו הגדול דורכאויס די אלע יארן.
אין די לעצטע תקופה איז דער רבי ליידער געווען נישט געזונט, דער רבי איז געווען שפיטאליזירט עטליכע מאל ווען עס האט שוין אויסגעזעהן זייער שמאל די מצב, אבער צו יעדנ'ס וואונדער איז דער רבי נאך אהיימגעקומען און ווייטער געדינט דעם אויבערשטן בביתו נאוה קודש. היינט שבת פארטאגס נאכן אנגעשטעקט ווערן מיט א שווערע וויירוס און א פרישע אינפעקציע, האט דער רבי געליטן א שווערע הארץ אטאקע רח"ל און קורצליך דערויף צוריקגעגעבן נשמתו הזכה ליוצרה, במעמד פון די קינדער מקורבים און מתפללי בית מדרשו.
די מסע הלוויה איז פארגעקומען מוצאי שבת קודש בבית מדרשו אין ירושלים, וואו אחיו הגדול כ"ק אדמו"ר ממשכנות הרועים שליט"א האט מספיד געווען בקול בוכים, און מכתיר געווען בנו הגדול פונעם רבי'ן זצ"ל הרה"צ רבי אברהם ראבינאוויטש שליט"א אלס ממלא מקומו בקודש באדמורו"ת פאריסוב, און צו די זעלבע צייט פארבעטן דעם צווייטן זון הרה"צ רבי הלל ראבינאוויטש שליט"א פון מאנסי לכהן פאר אלס אדמו"ר מפאריסוב און משפיע זיין פאר אידישע קינדער תורה וחסידות.
דער רבי איז געקומען לקבורה אויפן הר המנוחות נאך חצות הלילה, נעבן זיין גרויסן פאטער הגה"ק רבי בנימין ראבינאוויטש זצ"ל.
דער רבי זצ"ל לאזט איבער א הערליכע דור בנין וחתנין רבנן, די צוויי דערמאנטע זיהן ממלאי מקומו בקודש, און די משפחה פון זיין זון הרה"צ ר' יהושע אשר זצ"ל וועלכער איז נפטר געווארן בחיים חיותו. די איידימער פון רבי'ן זענען כ"ק אדמו"ר מספינקא בני ברק שליט"א, כ"ק אדמו"ר מקרעטשניף קרית גת שליט"א, און הרה"צ ר' צבי אלימלך לייפער שליט"א מטעמעשוואר.
אויך לאזט דער רבי איבער די חשובע געהויבענע ברידער, כ"ק אדמו"ר ממשכנות הרועים שליט"א, כ"ק אדמו"ר מקאלושין שליט"א, און הגה"צ ר' יהושע אשר ראבינאוויטש שליט"א אדמו"ר מזעליחוב וראש ישיבת משכנות הרועים.
זכר צדיק לברכה לחיי העולם הבא.
