אין די יעצטיגע טעג ווערט באקאנט א גאר פריידיגע דערגרייכונג בחצרות הקודש סקולען ברחבי תבל, איבער די אפקויף פון א נייע בית החיים שע"י קהילות הק' סקולען, מיט הונדערטער חלקות וואס וועט פארקויפט ווערן פאר חסידי ומעריצי בית סקולען, יראים וחרדים לדבר ה'.
ווי באקאנט זענען די הייליגע צדיקים לבית סקולען זצ"ל באערדיגט אין א קליינע חלקה שע"י ק"ק סקולען, אינעם בית החיים דקהל תורת חיים וויזניץ אין מאנסי, די חלקה איז געשאנקען געווארן פאר די סקולענער קהילה מיט פינף און פערציג יאר צוריק, מיטן הסתלקות פון הרה"ק בעל נועם אליעזר מסקולען זצ"ל, און אין די לעצטע פאר יאר האט מען אויך באערדיגט דארט בנו ממלא מקומו הרה"ק בעל מאור ישראל מסקולען זצ"ל, און בנו ממלא מקומו הרה"ק בעל ישועת יעקב מסקולען זצ"ל.
ווען די רעדע איז אבער פון סקולענער חסידים, איז געווארן גאר שווער צו באקומען א חלקה נעבן די סקולענער רביים, סיי צוליב דאס מאנגל אין פלאץ, און סיי צוליב די פאקט אז די חלקה געפונט זיך אין א בית החיים פון א אנדערער קהילה, וואס דארף באזארגן די אייגענע בני הקהילה מיט א חלקה לאחר מאה ועשרים.
אין די לעצטע פאר יאר האבן עטליכע עסקנים לבית סקולען זיך צוזאמגעזעצט דן צו זיין איבער דעם ענין, און נאכן ערהאלטן די ברכת והוראת הקודש פון אלע אדמורי"ם שליט"א לבית סקולען, האט מען אפגעקויפט א באזונדערע בית החיים פאר די סקולענער קהילות, וואס רעכנט אריין קהל ישועת ישראל סקולען אין בארא פארק, קהל מאור ישראל סקולען אין וויליאמסבורג, קהל נועם אליעזר סקולען אין מאנסי, קהל נועם אליעזר סקולען אין לעיקוואד, קהל נצח ישראל סקולען אין וויליאמסבורג, און קהל מאור ישראל סקולען אין ירושלים עיה"ק, תחת דגלם והדרכתם פון כ"ק מרנן האדמורי"ם מסקולען שליט"א.
די נייע בית החיים געפונט זיך סמוך ונראה צום ציון הק' פון צדיקי בית סקולען אין די וויזניצע בית החיים, אראפ די בריק טשורטש גאס, הארט נאך די מאנסי בית החיים וואו עס ליגן אויך באערדיגט א צאל קדושי עליון. עס פארמאגט אן אריינגאנג סיי פון די גאס, און סיי פון די מאנסי בית החיים, וואס פארמאגט א דורכגאנג צום וויזניצע בית החיים.
די נייע בית החיים "חלקת חסידים – סקולען" איז געווידמעט פאר חסידי ומעריצי בית סקולען, און פאר אידישע קינדער היראים וחרדים לדבר ה', וואס זענען הולכים לאורם מיט די הייליגע הדרכות וואס די סקולענער רביים האבן פארלאנגט און מעורר געווען, א שטייגער ווי תקנות בעניני טעכנעלאגיע, די תקנה נישט צו גיין מיט ביי האר, און די תקנה נישט צו פארמאגן קיין טעלעוויזיע אינדערהיים.
אין די יעצטיגע טעג ווערט אוועקגעשטעלט א פולשטענדיגע חברה קדישא שע"י קהילות סקולען, וואס וועט פארפיגן אויף אלע אנגעלעגנהייטן איבער די בית החיים, בהוראתם והדרכתם פון די סקולענער אדמורי"ם שליט"א, וכמנהג צדיקים הקודמים אין די פריערדיגע דורות.
