בלויז געציילטע חדשים זענען אדורך זינט דער מפעל 'חיים של שלום' ד'באבוב האט געמאלדן א פרישע אינציאטיוו צו מאכן צוויי שבע ברכות ווייניגער אין די וואכן טעג – עפעס וואס איז שוין לכל הדעות איבריג און אומנויטיג. דערביי האט דער מפעל געמאלדן א באלוינונג פון 2,000 דאלאר פאר אלע וואס וועלן עס אויספירן, כדי צו געבן דעם נויטיגן חיזוק און אוועקשטעלן דעם ענין מיט א כח הרבים.
די נייעס איז אויפגענומען געווארן מיט אויסטערלישער אינטערעסע, ווען די גאנצע היימישע וועלט האט הנאה געהאט צו זען דעם נחשון אין דעם געדאנק וואס אזויפיל קרעכצן שוין דערויף יארן לאנג, און הכל מודים אז עס איז שוין הויך צייט עפעס צו טון דערוועגן. לויט ווי עס ווערט איבערגעגעבן, האבן זיך שוין מערערע קהילות פארבונדן מיט ק"ק באבוב צו הערן די דעטאלן, און בכלל אריינצוקוקן ווי אזוי אנהייבן צו טון אין דעם ענין לטובת זייערע קהילה מיטגלידער.
אצינד, נאך בלויז עטליכע חדשים, איז 'חיים של שלום' ארויסגעקומען מיט א פרישע סעריע רעקלאמעס ארויסצוברענגען די שטארקייט פון דעם געדאנק אונטערן נאמען "הכל מודים". זיי ברענגען ארויס אז יעדע שבע ברכות מיינט פולע בעיביסיטערס, ביטול חברותות, און אן אויסנאמע עול וואס קיינער זוכט נישט, ועוד הרבה. דערביי האבן זיי אויך געמאלדן אז שוין העכער צוויי מנינים מחותנים האבן זיך אנגערופן "הננו" און געדינט אלס די ראשונים אין עפעס וואס יעדער וויל שוין טון, נאר דער כח הרבים האט ביז איצט געפעלט.
אצינד הערט מען אין מערערע קהילות קדושות אז מען זיצט און מען דן וויאזוי מען קען אויך אויספירן דעם געדאנק און עס פארשפרייטן פיל ווייטער, האבנדיג פאר די אויגן דעם דעת הקהל און דעם חסרון כיס וזמן וואס יעדע שבע ברכות ברענגט מיט זיך.
