נעכטן מיטוואך פרשת וירא האט כ"ק אדמו"ר מוויזניץ שליט"א פון מאנסי אויפגעטרעטן מיט די יערליכע דרשת פתיחת הזמן פאר די כולל אינגעלייט בבנין ביהמ"ד הגדול וויזניץ אין מאנסי, וואו דער רבי שליט"א האט אויסגענוצט די געלעגנהייט צו מעורר זיין דעם ציבור חסידים איבער די בעפארשטייענדע וואלן וואס קומט פאר די קומענדיגע וואך.
אין א זעלטענע שריט האט דער רבי שליט"א גאר שטארק אויפגעפאדערט די חסידים צו שטימען בלויז פאר די קאנדידאטן וואס זענען געווארן אינדארסירט דורך די קהילה און די מוסדות, זאגענדיג אז מען טאר זיך נישט לאזן פארפירן פון די אלע וואס פרובירן אנצודרייען און אוועקנעמען דעם כח הרבים.
דער רבי שליט"א האט זיך באצויגן צו די לעצטיגע ערשיינונג ווען עס קומען אן אויף די פאסט פארשידענע סארט צעטלעך און בראשורן, וואס קלערט אויף דעם ציבור זיך נישט צו לאזן פירן פון די עסקנים, מיט א טענה אז די עסקנים מאכן געלט און זיי מיינען בלויז זיך, דער רבי האט זיך אויסגעדרוקט אז מען איז מבזה קהילות דערמיט, מען איז מבזה מענטשן.
דערביי האט דער רבי ערקלערט אז מען קען נישט מסביר זיין פאר יעדן איינעם, אבער עס איז דא די קהילה, און עס איז דא די מוסדות, מען זיצט בכובד ראש און מ'איז מחליט וואס מ'איז מחליט, און מען דארף וויסן אז מען דארף פאלגן, מ'זאל נישט זיין צו קלוג, און אויספאלגן צו וואוטן פאר וועם עס שטייט אויפן צעטל.
דער רבי האט אויסגעפירט אז אפילו ווען מען זאגט אז דער רבי ווייסט נישט, און מ'רעדט איין דעם רבי'ן, זאל מען וויסן אז אפילו אזוי דארף מען אויך פאלגן, און יעדער זאל עס אויספירן און ארויסגיין וועלן.
