אין א דראסטישע ווענדפונקט פאר'ן היסטארישן פראיעקט פון הקמת מרכז העולמי "פני מנחם" בעיר הקודש ירושלים, איז דעם פארלאפענעם שבת פר' לך אויפגעטריבן געווארן די אומגלויבליכע אסטראנאמישע סומע פון 72 מיליאן דאלאר דורך לעגענדארע פילאנטראפן ומוקרי תורה פון איבער דער גארער וועלט וואס האבן זוכה געווען מיטצולעבן די זעלטן גייסטרייכע ועידת הנגידים "שבת חברותא" בראשות ראש הישיבה הגאון הגדול ר' שאול אלתר שליט"א.
דער שבת מרומם איז געווען דער הויכפונקט פון די דריטע גראנדיעזע "ועידת החברותא" וואס ווערט אפגעראכטן צום דריטן יאר נאכאנאנד, ווען עס קומען זיך צונויף די תמכין דאורייתא און עמודי התווך וועלכע האבן די זכי' צו ביישטייערן פאר די הרחבת גבולי הקדושה והקמת מבצרים אדירים אינערהאלב קהלת פני מנחם, און לעבן מיט ימי אורה והתעלות בצלו פונעם ראש הישיבה שליט"א אין א בחינה 'כשהמלך בשדה', זיך אנשפענדיג פון זיין געוואלדיגן כח התורה, ביי די דרשות נפלאים ושיחות קודש און פלפולא דאורייתא וואס ווערט מיטגעהאלטן אויף א פערזענליכן פארנעם פון א חברותא'שאפט מיט'ן גאון אדיר ושר התורה.
די יעצטיגע ועידת הנגידים, שבת חברותא, איז אפגעראכטן געווארן אויף אן אייגנארטיגן פארנעם, און אויף א קעניגליכן שטייגער אין טעמפא פלארידע, וואו דער גאנצער שבת איז געווען מוקדש פאר שבת המתאחדת בתורתך, זיך משעשע זיין בחדוותא דאורייתא מיט'ן ראש ישיבה, וועלכער האט במשך דעם גאנצן שבת פארברענגט מיט די נגידים בעם ואוהבי תורה, אין די סוגיות הש"ס וואס איז געלערנט געווארן בצוותא חדא.
אויף דעם ועידת חברותא איז באשטימט געווארן די סוגיא פון "כופין על המצוות", אין וואס מ'האט זיך געקאכט במשך די ימי ועידה, שלונגענדיג מיט דורש די חידושים נפלאים וואס דער ראש ישיבה האט משמיע געווען און מפלפל געווען איינעם מיט'ן ציבור, צאמווארפנדיג דערביי סוגיות והילכתות פון גאנץ ש"ס.
דער הויכפונקט איז געווען בעת נעילת שער, ביים מלכות'דיגן דינער "תוכו רצוף אהבה", וואס איז אפגעראכטן געווארן מוצאי שבת, וואו די נגידים האבן מיטגעלעבט שעות של קורת רוח ביים גאר רייכן פראגראם וואס איז צוגעשטעלט געווארן לכבודם.
דער מעמד איז אנגעפירט געווארן דורכ'ן בארימטן פה מפיק מרגליות הרה"ח ר' ישראל שטערן הי"ו פון לאנדאן.
עס איז לעבעדיג אויפגעשפילט געווארן די בוי-פלענער פונעם מרכז העולמי פני מנחם אין ארץ ישראל פון ירושלים, אויפ'ן ריזן שטח אויף רחוב תורה מציון, ווערנדיג געצייגט אויף אלע דעטאלן דורכ'ן בארימטן ארכיטעקט-מייסטער ר' אהרן אסטרייכער וואס שטייט אין שפיץ פון אהערשטעלן דעם פראיעקט.
דער קלימאקס איז געווען בשעת עס איז געווארן פארקויפט "עמודי הבנין", אן עמוד פאר'ן סכום פון א מיליאן דאלאר, וחכמי לב יקחו מצוות, זענען בליץ-שנעל אויספארקויפט געווארן אלע 26 עמודים, די צענטראלע זוילן פונעם בנין האדיר, און בנוסף צו נאך התרמות פון די נגידים, האט זיך צאמגעציילט אן אומגלויבליכע מעגא סכום פון 72 מיליאן דאלאר וואס איז אויפ'ן פלאץ צאמעשטעלט געווארן. די ציפפערן איז איבערגעגעבן געווארן ביים ענדע פונעם מעמד שליסנדיג די גייסטרייכע ימי ועידה, דורכן געטרייען מנכ"ל המוסדות הרב נחמן ווידיסלאבסקי הי"ו.
צום שלוס האט דער ראש ישיבה משמיע געווען א לענגערע שיחות קודש איבער די גרויסע זכי' וואס די נגידים האבן דא איינגעקויפט און באזונדער ארויסגעהויבן וואס מ'איז דא זוכה, ווען דער מרכז התורה ווערט אויפגעבויט אויפ'ן פלאץ וואו ס'איז געשטאנען א טריפה'נע ראדיא סטאנציע, וואו ס'איז במשך השנים געהערט געווארן דברי מינות ואפיקורסות, און מ'האט די זכי' מקיים צו זיין מצוות מחיית עבודה זרה, און אויף דעם פלאץ וועט ארויסגיין תורה וטהרה לכל העולם.
