אין די יעצטיגע טעג איז באשטעטיגט געווארן די פלענער אויף א ספעציעלע גייסטרייכע שבת וואס כ"ק אדמו"ר מסקווירא שליט"א וועט אפרעכטן אינאיינעם מיט א ענגע צאל נגידים בעם, נדיבים ותומכים וואס לאזן זיך קאסטן אסטראנאמישע געלטער פארן אויפבוי פון די נייע ביהמ"ד הגדול והחדש אין שיכון סקווירא.
דאס קומט נאכדעם וואס די הנהלת הקהילה און די וועד "הקמת הבית" טוט ווייטער פארזעצן מיט די הרחבת גבולי הקדושה, סיי מיטן פארענדיגן די בוי ארבעט ביים גיגאנטישן ביהמ"ד הגדול והחדש וואס איז שוין באנייעט געווארן מיט צוויי יאר צוריק, און סיי מיטן אויפבוי פון א שפאגל נייע בנין היכל השולחנות והיכל התורה, אויפן ארט וואו עס געפונט זיך אצינד די אלטע ביהמ"ד אין שטעטל, וואס מען גרייט זיך שוין אראפציווארפן אין די נאנטע טעג.
די אלע נדיבים ותומכים וואס שליסן זיך אן מיטן אסטראנאמישן סכום פון א האלבע מיליאן דאללער לטובת די הקמת הבית, וועלן האבן די געוואלדיגע זכיה להסב על שולחן המלך, און מיטהאלטן א זעלטענע פריוואטע און גייסטרייכע שבת בצל הקודש פונעם רבי'ן שליט"א כשהמלך בשדה, ארגינעל איז געווען געפלאנט אפצוהאלטן דעם שבת אין מאליבו קאליפארניע, במקום הנופש פונעם רבי'ן שליט"א צוויי מאל א יאר, אבער צוליב טעכנישע אנגעלעגנהייטן איז עס נישט געווען מעגליך, און דעריבער איז באשלאסן געווארן אפצורעכטן דעם שבת אין א פראכטפולן האטעל אין אריזאנע, וואס געפונט זיך על אם הדרך פון ניו יארק קיין קאליפארניע.
לויטן פלאן וועט דער רבי שליט"א ארויספארן ממעון קדשו אין שיכון סקווירא דאנערשטאג פרשת ויגש, און בו ביום אנקומען קיין אריזאנע צום באשטימטן האטעל, וואו עס וועט געפראוועט ווערן דעם גייסטרייכן שבת פרשת ויגש אינאיינעם מיט די נדיבים בעם. און נאך שבת וועט דער רבי שליט"א פארזעצן די נסיעה קיין קאליפארניע, וואו דער רבי וועט זיך אויפהאלטן די נאכפאלגענדע דריי וואכן אויף אפרוה.
נאך וואס ביז יעצט איז געווען באשטימט אז הגה"צ ר' אהרן מענדיל טווערסקי שליט"א בנו הגדול פונעם רבי'ן, וועט פראווענען א גרויסע שבת בקרב חסידי סקווירא אין שטאט מאנסי, יענעם שבת פרשת ויגש, זענען די פלענער געטוישט געווארן אצינד, און די גרויסע שבת אין מאנסי איז געווארן אפגעשטופט אויף א וואך שפעטער, שבת פרשת ויחי, אביסל מער ווי א וואך בעפאר די געהויבענע נסיעה וואס די קינדער פון כ"ק אדמו"ר מסקווירא שליט"א נעמען אונטער קיין ארץ ישראל סוף חודש טבת.
