גרויס התרגשות הערשט בקרב יהדות שיקאגא מקבל צו זיין פני קדשו פון כ"ק אדמו"ר מבאבוב 45 שליט"א וועלכע וועט קומען פראווענען דעם קומענדיגן שב"ק פ' ויצא בקרב קהילת חודרוב אין שטאט, לכבוד דעם שבתא דריגלא שמחת השבת שבע ברכות פארן טאכטער פונעם רב הקהילה הגה"צ אב"ד חודרוב שליט"א, וואס דער חתן איז אן אייניקל פון כ"ק האדמו"ר מבאבוב-45 שליט"א.
דער רבי שליט"א קומט צו פארן אויף די פערזענליכע בקשה פונעם מחותן אבי הכלה הגה"צ אב"ד חודרוב שליט"א וועלכע האט שטארק מפציר געווען ביים רבי'ן שליט"א צו קומען מהכא להתם מחזק צו זיין בני קהילת חודרוב, וואס דעם רבי'נס השתתפות ביים שבת וועט ווי פארשטענדליך אריינבלאזן חיזוק אין די קהילה, און וועט צוגעבן פאר וכבוד פארן דערהויבענעם שבת של שמחה, און דער רבי שליט"א איז טאקע נעתר געווארן לבקשת מחותנו.
די חתונה פון החתן בן הגה"צ רבי מנחם נחום הורוויץ שליט"א ר"מ במתיבתא ד'באבוב 45, איידעם ביי כ"ק אדמו"ר מבאבוב 45 שליט"א, מיט די כלה א טאכטער פון הגה"צ אב"ד חודרוב שיקאגא שליט"א, וועט פארקומען דינסטאג פ' ויצא ז' כסלו, במקהלות אלפי חסידים בהיכל ביהמ"ד הגדול ד'באבוב 45 אין בארא פארק.
סוף וואך פ' ויצא וועט דער רבי שליט"א אינאיינעם מיטן חתן און די מחותנים זיך ארויסלאזן קיין שיקאגא אויפן שמחת השבת שבע ברכות וועלכע וועט דארט פארקומען, דער רבי שליט"א וועט וויילן עטליכע טעג און משפיע זיין מזיו הודו אויף די שטאט.
דער גאנצער שבת וועט זיין געווידמעט פאר די בני המשפחה און פאר בני קהילת חודרוב, אלע תפילות און טישן וועלן פארקומען ברוב פאר והדר אין ביהמ"ד חודרוב אין צענטער פונעם היימישן געגענט אין שיקאגא.
וויבאלד ביהמ"ד חודרוב איז צר מלהכיל פאר א גרעסערן ציבור וועלכע וואלטן נאטורליך געוואלט מיטהאלטן אזא שבת של שמחה, איז מטעם ק"ק באבוב-45 ארויסגעשטעלט געווארן מודעות אז בלויז א מספר מצומצם פון חסידים וועלן ערלויבט ווערן מיטצופארן פון ניו יארק מיטהאלטן דעם זעלטענעם שבת בבית מדרשו פונעם מחותן אבד"ק חודרוב, און א בעפארצוג איז געגעבן געווארן פאר תלמידי המתיבתא פון שיעור ג' און העכער, וועלכע זענען קרובים אל ליבו פונעם גרויסן זיידן דער ראש הישיבה כ"ק אדמו"ר מבאבוב 45 שליט"א, און וואס דער אבי החתן הגה"צ רבי מנחם נחום הורוויץ שליט"א איז פון די חשוב'ע רמ"י הישיבה און האלט א נאנטן קשר מיט די תלמידי המתיבתא.
