חסידי ומעריצי בית אמשינאוו בארה"ק גרייטן זיך צו מקבל זיין בהדרת כבוד דער חשובער גאסט פון אמעריקע, כ"ק אדמו"ר מאמשינאוו ארה"ב שליט"א, וועלכער וועט אנקומען אויף א לענגערע באזוך אין ארץ ישראל די קומענדיגע וואך, צו באשיינען די שמחת החתונה בבית אחד מחסידיו, און וועט פראווענען א גרויסן שבת התוועדות מיט כלל חסידיו אין ירושלים עיה"ק.
ווי באקאנט האט דער רבי שליט"א פאר לאנגע יארן געוואוינט אין ארץ ישראל, אינעם עיר התורה והחסידות בני ברק, ביז נאכן הסתלקות פונעם פאטער דער רבי זצ"ל ווען דער רבי האט זיך געצויגן קיין בארא פארק אנצופירן דעם שיינעם אמשינאווער הויף.
דער רבי שליט"א וועט זיך ארויסלאזן אין וועג קומענדיגע וואך מאנטאג פרשת בהעלותך, און וועט אנקומען בשערי ארה"ק צומארגנס דינסטאג פרשת שלח בארה"ק, דאנערשטאג וועט דער רבי באשיינען די שמחת החתונה פון מקורבו החתן נחום ביסטריצקי נ"י, וואס קומט פאר אין די קאנקארד זאל אין בני ברק.
שבת קודש פרשת שלח בארה"ק וועט דער רבי שליט"א פראווענען א שבת התוועדות מיט חסידיו ומעריציו פון ארץ ישראל, די שבת וועט געפראוועט ווערן בתוככי ירושלים עיה"ק, און נאך שבת וועט דער רבי שליט"א ארויספארן אויף א נסיעה צו די מקומות הקדושים אין מירון צפת טבריה להיפקד בדבר ישועה ורחמים, איידער דער רבי וועט זיך אומקערן אהיים קיין ניו יארק מיטוואך פרשת שלח.
