די וואך פרשת אחרי קדושים, וועט כ"ק אדמו"ר מוויזניץ שליט"א פון קייאמישא אפרייזן אויף א נסיעה קיין טאראנטא קאנאדע, וואו דער רבי וועט פראווענען א גרויסן שבת צום ערשטן מאל נאכן איבערנעמען די כתר האדמורו"ת, און באשיינען א רייע מסיבות און באנקעטן לטובת די מוסדות הקדושים אין קרית וויזניץ קייאמישא לעיק המתנוסס לתפארה.
דער רבי שליט"א איז ערווארטעט ארויסצופארן דעם דאנערשטאג פרשת אחרי קדושים, נאכן שמחת פדיון הבן פון א אור אייניקל, און אייניקל פון כ"ק אדמו"ר מוויזניץ שליט"א פון מאנטריאל, וואס קומט פאר דאנערשטאג מיטאג אין ביהמ"ד בית מרדכי דחסידי וויזניץ קייאמישא אין מאנסי.
אנקומענדיג קיין טאראנטא דאנערשטאג אויפדערנאכט וועט פארקומען א מעמד קבלת פנים לכבודו, און דורכאויס די וואך וועט דער רבי האבן די אכסניא אין שטוב פון הנגיד החסיד ר' ישראל מאיר מאיראוויטש הי"ו, לאנגיעריגער בעל אכסניא פון אדמור"י בית וויזניץ אין טאראנטא.
אויף שבת איז ערווארטעט א גרויסן ציבור חסידים וואס קומען צו פארן פון איבער גרעיטער ניו יארק צו מיטהאלטן דעם גרויסן שבת בצל הקודש, די תפילות און טישן וועלן געפראוועט ווערן אינעם בנין פון בית יעקב, וואס ווערט צוגעשטעלט דורך די עסקני העיר און די עסקני המוסדות ביד רחבה וברוח נדיבה.
דורכאויס שבת וועט דער רבי האבן די אכסניא אין שטוב פון הנגיד החסיד ר' מרדכי איינהארן הי"ו, וואס געפונט זיך נעבן די בית יעקב זאל, און נאך שבת וועלן פארקומען א רייע מסיבות און באנקעטן בבתי נגידים ושועים, וואס שליסן זיך אן מיט גרויסע סכומים למען החזקת המוסדות אין די וויזניצע שטעטל אין קייאמישא לעיק.
