הונדערטער חסידי סקווירא תושבי בארא פארק גרייטן זיך אצינד מיטצולעבן א געהויבענע באזוך און א שבת התאחדות והתעלות, אין שפיץ פון הגה"צ ר' אהרן מענדיל טווערסקי שליט"א בנו הגדול פון כ"ק אדמו"ר מסקווירא שליט"א, וועלכער וועט אפשטאטן א באזוך פון א פולע וואך בקרב חסידי סקווירא אין בארא פארק, און באזוכן אין אלע אפטיילונגען פון די קהילה און מוסדות בתוככי העיר.
די געהויבענע באזוך רופט אויס גרויס התרגשות ביי סקווירא חסידים אין בארא פארק, ווען אין די לעצטע פופצן יאר זינט דאס לעצטע מאל וואס כ"ק אדמו"ר מסקווירא שליט"א האט געפראוועט א שבת אין בארא פארק, איז נאכנישט פארגעקומען קיין שבת התאחדות וואס האט פאראייניגט אלע חסידים אין בארא פארק, איבערהויפט ווען דורכאויס די פופצן יאר זענען די ציפערן שטארק געשטיגן, מיט נאך צוויי סקווירא שטיבלעך וואס האבן זיך געעפנט אין בארא פארק, מיט א סך הכל פון פינף שטיבלעך, און אזוי אויך איז די מוסדות הקדושים זיך צעוואקסן אויף א שטארקע פארנעם בליעה"ר.
דער חשובער גאסט בנו הגדול פונעם רבי'ן וועט מופיע זיין בשערי העיר קומענדיגע וואך דינסטאג פרשת אמור, און וועט פארבלייבן אין שטאט פאר א פולער וואך, ווען יעדן טאג וועט ער דאווענען א תפילה און פראווענען א מסיבת לחיים אין א אנדערער שטיבל. דורכאויס די וואך וועט ער באזוכן אין די סקווירא תלמוד תורה, מיטהאלטן די סדרי הלימודים און אויפטרעטן פאר די תלמידים. א ספעציעלע באזוך וועט פארקומען אין די סקווירא כולל, א ספעציעלע באזוך אין די ישיבה קטנה, און א ספעציעלע באזוך אין די מיידל שולע בית ציפורה.
פרייטאג פסח שני וועט פארקומען א ספעציעלע סעודה לכבוד היום, אינאיינעם מיט א געקליבענע צאל נדיבי לב תומכי המוסדות, די אכסניא דורך די וואך וועט זיין אין שטוב פון הנדיב הנכבד ר' משה דיאמאנד הי"ו, און אויף שבת וועט ער האבן די אכסניא אין שטוב פון הנדיב הרב ר' יוסף סמיט הי"ו.
צום הויכפונקט וועט געפראוועט ווערן א גייסטרייכע שבת פאר כלל חסידי סקווירא תושבי בארא פארק, מיטן נאמען "שבת הקהל", ווען די מתפללים פון אלע שטיבלעך וועלן פארברענגען אינאיינעם און זיך דערווארעמען בצילו פונעם רבינ'ס עלטסטע זון און שליח המיוחד. עטליכע זאלן אין די באבובער מיידל שולע זענען געווארן ארויסגעדינגען פאר דעם צוועק, די תפילות וועלן געפראוועט ווערן אין די נייע זאל "אולם דוד שארף", און די סעודות שבת וועט געפראוועט ווערן אין די זאל פון "עטרת גאלדא".
פרייטאג צונאכטס וועט די סעודת שבת זיין געווידמעט פאר די אינגעלייט און בעלי בתים, און שבת אינדערפרי וועט די סעודה זיין געווידמעט פאר די בחורי חמד. שבת נאכמיטאג וועט דער חשובער גאסט באשיינען א חברת תהלים מיט די תינוקות של בית רבן, נאכגעפאלגט מיט א גרויסע שלש סעודות לכל הקהל הקודש בצוותא חדא.
