בחצר הקודש סקולען גרייט מען זיך אויף א גרויסע און ערשטמאליגע שבת די וואך פרשת נשא, ווען כ"ק אדמו"ר מסקולען שליט"א פון ירושלים וועט זיין צוגאסט אינעם עיר ואם בישראל בארא פארק, און אויף א ערשטמאליגע פארנעם פראווענען א פולער שבת אינאיינעם מיטן פלומעניק כ"ק אדמו"ר מסקולען שליט"א, ממלא מקומו וממשיך דרכו בקודש פון אחיו הגדול כ"ק אדמו"ר מסקולען זצ"ל בעל ישועת יעקב.
דער סקולענער רבי שליט"א פון ירושלים קומט צו פארן קיין ניו יארק לפאר על ראש שמחתו, מיט די געבורט פונעם עלטסטן בן זכר ביים רבינ'ס זון הרב יעקב יוסף פארטוגאל שליט"א, איידעם ביי כ"ק אדמו"ר מחוסט שליט"א פון בארא פארק, די שמחת הברית קומט פאר קומענדיגן מאנטאג פרשת בהעלותך, און דער רבי שליט"א וועט שוין אנקומען קיין ניו יארק נאך פאר שבת צו באשיינען אויך די שמחת השלום זכר.
אין א ערשטמאליגע פארנעם וועט כ"ק אדמו"ר מסקולען שליט"א פראווענען א שבת אינאיינעם מיט איינער פון זיינע פעטערס כ"ק האדמורי"ם מסקולען שליט"א, ווען דער סקולענער רבי פון ירושלים וועט פראווענען דעם גאנצן שבת אין סקולענער בית המדרש אין בארא פארק אינאיינעם מיטן פלומעניק, במקום שהתפללו אבותיו דארט וואו אביו הגדול כ"ק אדמו"ר הרה"ק בעל מאור ישראל מסקולען זצ"ל האט לאנגע יארן געפראוועט די עבודת הקודש, און דארט וואו דער רבי שליט"א זעלבסט האט משמש געווען ברבנות, בעפארן אננעמען די כתר האדמורו"ת אין ירושלים עיה"ק.
פרייטאג צונאכטס וועלן ביידע רבי'ס אריינקומען צום טיש אנגעהויבן פון שלום עליכם, און שפעטער ביים סוף טיש וועט פארקומען די שמחת השלום זכר פון א אייניקל ביים סקולענער רבי'ן פון ירושלים, הונדערטער חסידי ומעריצי בית סקולען זענען ערווארטעט מיטצוהאלטן דעם ערשטמאליגן שבת, סיי ביי די טיש פרייטאג צונאכטס און שלש סעודות, און ביי אלע תפילות דורכאויס שבת.
די שמחת הוואכנאכט וועט פארקומען זונטאג נאכט, און די שמחת הברית מאנטאג אינדערפרי, שפעטער אין וואך וועט דער רבי שליט"א צוריק אהיימפארן למעון קדשו אין ירושלים עיה"ק.
