אריינטרעטנדיג אין די ימי השמחה בחצרות בית וויזניץ און ראחמיסטריווקא, גרייטן זיך חסידי וויזניץ מיטצוהאלטן א שיינע שבת אינעם עיר ואם בישראל בארא פארק, ווען די צוויי ברידער כ"ק האדמורי"ם מוויזניץ שליט"א פון קייאמישא און מאנטריאל וועלן זיין צוגאסט אין שטאט לרגל השמחה במעונם, און פראווענען די תפילות און טישן ברוב עם.
קומענדיגן מיטוואך וועט פארקומען די שמחת החתונה פונעם חתן א אייניקל פון כ"ק אדמו"ר מוויזניץ שליט"א פון מאנטריאל, א זון פון זיין זון הגה"צ ר' מנחם שלמה האגער שליט"א, איידעם ביי הגה"צ אבד"ק ראחמיסטריווקא מאנסי שליט"א, מיט די כלה א טאכטער פון הגה"צ ר' מרדכי פנחס טווערסקי שליט"א ראש ישיבת עסק התורה ראחמיסטריווקא, זון פון כ"ק אדמו"ר מראחמיסטריווקא שליט"א, און איידעם ביי כ"ק אדמו"ר מוויזניץ שליט"א פון קייאמישא.
די ימי השמחה האט זיך שוין אנגעהויבן דעם שבת ביים שמחת האויפרוף אין וויזניצע בית המדרש אין מאנטריאל, און די שמחת החתונה וועט געפראוועט ווערן אין בארא פארק אין ביהמ"ד הגדול ראחמיסטריווקא, נאכגעפאלגט מיטן שבת שבע ברכות וואס קומט פאר בצל הקודש פונעם זיידן כ"ק אדמו"ר מראחמיסטריווקא שליט"א.
לכבוד די שמחה וועלן די זיידעס משני הצדדים האחים האדמורי"ם מוויזניץ שליט"א פון קייאמישא און מאנטריאל זיין צוגאסט אויף שבת אין בארא פארק, און מיטהאלטן די שבת של שמחה בחצר הקודש ראחמיסטריווקא. דער וויזניצער רבי פון קייאמישא וועלכער איז אן איידעם ביי כ"ק אדמו"ר מראחמיסטריווקא זצ"ל, האט שוין מיט צוויי יאר צוריק געפראוועט א שבת של שמחה אין בארא פארק, און אפגעראכטן די תפילות און טישן אין ביהמ"ד הגדול ראחמיסטריווקא, אינאיינעם מיטן שוואגער כ"ק אדמו"ר מראחמיסטריווקא שליט"א.
אצינד ווען דער וויזניצער רבי פון מאנטריאל איז אויך א זיידע ביי די שמחה, וועלן די צוויי ברידער האדמורי"ם מוויזניץ אפרעכטן די תפילות און טישן אין ביהמ"ד הגדול ראחמיסטריווקא, אינאיינעם מיטן שוואגער / קאזין כ"ק אדמו"ר מראחמיסטריווקא שליט"א, וואס רעכנט אריין די טיש ליל שבת קודש, און די תפילות שבת אינדערפרי נאכגעפאלגט מיטן סעודת צפרא דשבתא.
פרייטאג צונאכטס וועלן ביידע וויזניצע רבי'ס דאווענען אין וויזניצע בית המדרש אויף נוא יוטרעקט, אינאיינעם מיט זייער פלומעניק כ"ק אדמו"ר מוויזניץ שליט"א פון בארא פארק, און שלש סעודות ווען אין וויזניץ איז דער מנהג צו אפרעכטן שלש סעודות אין א פריערדיגע צייט ווי אין ראחמיסטריווקא, וועלן ביידע וויזניצע רבי'ס פראווענען אינאיינעם מיט זייער ברודער כ"ק אדמו"ר מוויזניץ שליט"א פון ירושלים, בבית מדרשו אויף די צוויי און פערציגסטע סטריט.
