א היסטארישע מעמד וואס ווערט פארצייכנט מיט גאלדענע אותיות בקורות ימי טשערנאביל בארץ הקודש, איז פארגעקומען דעם זונטאג פרשת תולדות כ"ח חשון, ווען חסידי טשערנאביל פון איבער די גאנצע וועלט זענען זיך צוזאמגעקומען אין די פראכטפולע די סיטי פעסטונג אין מעלה אדומים נעבן ירושלים, אוועקצושטעלן א פעסטע יסוד פארן קרן הבנין צו פארענדיגן די בוי ארבעט ביים תל תלפיות, ביהמ"ד הגדול טשערנאביל אין בני ברק.
די גרויסע מעמד איז פארגעקומען אין סאמע ברען פון די העפטיגע בוי פראיעקט וואס פארציהט זיך שוין עטליכע יאר, און מען האט שוין אויפגעבויעט א הערליכן גרויסן היכל פאר בית המדרש, אבער עס פעלט שטארק אויס ווייטערדיגע בוי ארבעט צו פארענדיגן דעם בנין לשם ולתפארת, צוצוברענגען הרחבת הדעת פאר אלע חסידים אומעטום און מתפללי בית המדרש.
לכבוד די מעמד זענען געקומען צו פארן פילע טשערנאבילער חסידים פון חוץ לארץ, וואס האבן שוין מיטגעהאלטן דעם שבת בעפאר בצל הקודש פונעם רבי'ן, אזוי אויך האט זיך שטארק אנגעזעהן די שמירה יתירה, ווען מען האט נישט גענוצט קיין שום סקרין דורכאויס די גאנצע מעמד.
אנקומענדיג צום די סיטי פעסטונג האבן די חסידים געהאט די געלעגנהייט צו כאפן א שפאציר אין א הערליכע אויסשטעל וואס איז אהערגעשטעלט געווארן דורך די עסקנים, אויסגעלייגט די חפצי קודש פון צדיקי בית טשערנאביל, מעזבונו פונעם טשערנאבילער רבי'ן זצ"ל, וואס האט געהאלטן געשפאנט דעם ציבור א לענגערע צייט.
אנהייב פון די מעמד האט מען געהערט פרקי שירה וזמרה מיט וואונדערליכע יצירות ממיטב בית טשערנאביל, דער יושב ראש המעמד איז געווען הרב ישראל שטערן שליט"א פון לאנדאן, און מען האט געהערט א דרשה פונעם גבאי ביהמ"ד הגדול הרב נתן אוללעך הי"ו בריח התיכון פון די קרן הבנין, וועלכער האט פארגעשטעלט די פלענער פארן ציבור, צו פארענדיגן דעם ביהמ"ד כלול בהדרו אין די קומענדיגע זיבעצן חדשים, אויב מען וועט היינט נאכט אויפקומען מיט די נויטיגע סכומים בעז"ה.
דערנאך האט אויפגעטרעטן דער יו"ר וועד קרן הבנין הרבני הנגיד ר' אברהם שלמה איינהארן הי"ו פון בארא פארק, און אלס נואם הכבוד האט אויפגעטרעטן הגה"צ ר' אהרן שיף שליט"א גאב"ד אנטווערפן. בהדרת כבוד האט מען מקבל געווען את פני הקודש פון כ"ק אדמו"ר מטשערנאביל שליט"א, וועלכער האט פארטיילט ספעציעלע מתנות פאר די נדיבים בעם, א טערקישע טלית מיט א טלית בייטל פאר די נדיבים פון הונדערט און פופציג טויזענט שקל און העכער, א היסטארישע מכתב קודש בחתימת יד קדשו פונעם רבי'ן, וואו דער רבי וואונטשט ברכות לרוב פאר די חשובע תומכים, פאר די נדיבים פון אכט און צוואנציג טויזענט שקל און העכער, און אזוי ווייטער.
