תלמידי וחסידי סאטמאר אין קרית יואל לעבן ווידער מיט אין די טעג הרחבת גבולי הקדושה, ווען מען האט אין א מזל'דיגע שעה אנגעהויבן די בוי ארבעט אויפצובויען א שפאגל נייע בנין פאר די ישיבה גדולה "מתיבתא תורה ויראה ד'סאטמאר", בהדרכתו ובברכתו פונעם ריש מתיבתא כ"ק אדמו"ר מסאטמאר שליט"א.
ווי באקאנט איז די סאטמארע ישיבה גדולה צוטיילט אין עטליכע סניפים, מיט עטליכע געביידעס שטייען לשם ולתפארת אויף די גרויסע ישיבה בארג אין "שכונת בארדיטשוב", א ישיבה על קברו סמוך ונראה צום ציון הק' פון הרה"ק מסאטמאר זי"ע. אצינד ווען מען גרייט זיך צו עפענען די פיפטע סניף אינערהאלב די ישיבה גדולה, האט מען געלאזט אין גאנג א העפטיגע בוי פראיעקט אויפצובויען א שפאגל נייע בנין הישיבה, אין צוגאב צו די זעקס אנדערע בנינים וואס דינען אלס קביעות'דיגע אכסניות פאר די טויזענטער תלמידי הישיבה.
די נייע בנין ווערט געבויעט אויף א ריזן שטח צווישן די בנין ישיבה גדולה סניף ברך משה, און די בנין ישיבה גדולה סניף קדושת יואל, וואו מען זעהט שוין די פאקטישע גראב ארבעט אויפן שטח מיטן האפענונג צו פארענדיגן דעם בנין ביז א יאר צוויי לשם ולתפארת. אין די זעלבע צייט איז באשטימט געווארן א דאטום ווען עס וועט פארקומען די גרויסע מעמד הנחת אבן הפינה, ביום הגדול "כ"א כסלו" דינסטאג פרשת וישב הבעל"ט, יום הצלה והשחרור פונעם מייסד הישיבה הרה"ק מסאטמאר זי"ע.
