הונדערטער תלמידים ויוצאי ישיבת סלאבאדקע גרייטן זיך אין די טעג מיטצוהאלטן א היסטארישע מעמד "גבורת שמונים", חגיגת יובל השמונים וכינוס תלמידים רבתי, וואס וועט אפגעראכטן ווערן ברוב פאר והדר דעם קומענדיגן מוצאי שבת קודש פרשת תולדות, אין די פראכטפולע בערקלי רעזארט האטעל אין ניו דזשערזי, אין שפיץ פונעם זקן ויושב בישיבה הגאון הגדול רבי משה הלל הירש שליט"א ראש ישיבת סלאבאדקע.
אכציג יאר איז אריבער זינט יענעם יאר תש"ס, ווען עס האט אנגעהויבן שיינען די ערשטע ליכטיגקייטן פון די בארימטע סלאבאדקע ישיבה אין ארץ ישראל, אין אנדענק פון די היסטארישע ישיבה אין שטאט סלאבאדקע אין דער אלטער היים. זינט יענעם טאג פאר גאנצע אכציג יאר טוט די קול התורה שטייגן מער און מער, מיט צענדליגע טויזענטער תלמידים וואס האבן זיך שוין משלים געווען דארט בין כותלי הישיבה אין לויף פון די יארן.
דער ראש ישיבה הגאון הגדול רבי משה הלל הירש שליט"א וועלכער טראגט אויף זיינע פלייצעס דעם עול החזקת הישיבה, איז אצינד געקומען צו פארן מהתם להכא בטלטולא דאורחא ובטלטולא דגברא רבא, אויפצוטרייבן די נויטיגע געלטער בערי ארצות הברית צו קענען ממשיך זיין דעם קול התורה, איבערהויפט אין די יעצטיגע שווערע תקופה ווען אחינו בני ישראל בארץ הקודש ליידן זיך צוזאם ביטער שווער צוליב די גזירת הגיוס, און עס פאדערט מסירת נפש צו קענען אנגיין מיט לימוד התורה בהתמדה.
נעכטן מיטוואך פרשת תולדות ראש חודש כסלו האט דער ראש ישיבה געלאנדעט אויפן אמעריקאנער באדן, אנקומענדיג צוערשט צו די היימישע געגנטער אין ניו יארק און ניו דזשערזי, איידער ער וועט ממשיך זיין די נסיעה קיין לאס אנדזשעלעס, וואו עס וועט ווידער פארקומען מסיבות און באנקעטן לטובת הישיבה בבתי נגידים ושועים אויף מסיבות און באנקעטן.
קומענדיגן מוצאי שבת פרשת תולדות וועט פארקומען די גרויסארטיגע מעמד חגיגת יובל השמונים וכינוס תלמידים רבתי, אינאיינעם מיטן סעודת מלוה מלכה להחזקת הישיבה, ווי דערמאנט וועט די מעמד פארקומען אין די בערקלי רעזארט האטעל אין דזשערזי, וואו מען וועט זוכה זיין צו הערן דעם דבר ה' ברמה פונעם סלאבאדקער ראש ישיבה שליט"א.
א רייכע פראגראם איז צוגעגרייט פאר די געהויבענע מעמד, אלס נואם הכבוד וועט אויפטרעטן הגאון הגדול רבי ארון רייך שליט"א ראש ישיבת וואודלעיק, און א הערליכע פרעזענטאציע וועט געוויזן ווערן איבער די התייסדות הישיבה מיט אכציג יאר צוריק, איבער הגאון הסבא מסלאבאדקע זצ"ל שטייענדיג הונדערט יאר נאך זיין הסתלקות, און איבער דעם גרויסן ראש ישיבה הגאון הגדול רבי אהרן קאטלער זצ"ל, שטייענדיג אין די דריי טעג ארום זיין יארצייט.
