א היסטארישע פסק דין איז ארויסגעגעבן געווארן נעכטן מיטוואך ביינאכט, ווען דריי גדולי מורי הוראה האבן געפסק'נט דעם דבר ה' זו הלכה, אנבאלאנגט די המשכת השלשלת בחצר הקודש סטוטשין, צווישן די צוויי באקאנטע קהילות אין בארא פארק, ק"ק סטוטשין בנשיאות כ"ק אדמו"ר מסטוטשין שליט"א, און ק"ק תולדות יהודה, בנשיאות כ"ק אדמו"ר הרה"צ רבי מרדכי מנשה זילבער שליט"א.
צענדליגע יארן איז שוין פארביי זינט די הסתלקות פון כ"ק אדמו"ר מסטוטשין זצ"ל בעל מנחת יהודה, ווען זיין אייניקל כ"ק אדמו"ר הרה"צ רבי אליעזר יהושע יודקאווסקי שליט"א האט איבערגענומען דעם כתר ההנהגה און דעם זיידנ'ס הויף, אין די זעלבע צייט וואס א קלענערע טייל פון די חסידים האבן פארמירט א קהילה בנשיאות כ"ק אדמו"ר הרה"צ רבי מרדכי מנשה זילבער שליט"א צו פירן דעם שיינעם קהילה תולדות יהודה.
אצינד נאך א קורץ פארצויגענע דין תורה, איז ארויסגעגעבן א פסק דין דורך דריי חשובע רבנים מורי הוראה, הרה"ג ר' שמעון יצחק שלעזינגער שליט"א חבר ביד"ץ העדה החרדית, הרה"ג ר' יקותיאל זלמן גראוס שליט"א, און הרה"ג ר' חיים אהרן מאנדרער שליט"א מקאסוב בית שמש.
אינעם פסק דין שרייבן די דיינים אז ק"ק תולדות יהודה, זאל מער נישט טראגן דעם נאמען "תולדות יהודה", און אויך נישט ארויסברענגען אויף קיין מוסדות אדער גליונות אז די קהילה איז א המשכה צום סטוטשינער רבי'ן זצ"ל, נאר מען זאל טוישן די נאמען פון די קהילה צו א נייע נאמען "ראפשיץ סטוטשין".
