חסידי צאנז בארה"ב נעמען אויף מיט פרייד די בשורה מרנינה, אז כ"ק אדמו"ר מצאנז שליט"א וועט אנקומען דעם ווינטער אויף א קורצן באזוך אין ניו יארק, לרגל די מעמד חנוכת הבית ופתיחת שערים פון די נייע בית המדרש הגדול שפע חיים דחסידי צאנז אין מאנסי, נאך א העפטיגע בוי פראיעקט פון עטליכע יאר לנצח על מלאכת בית ה'.
די צאנזע בית המדרש אין מאנסי ווערט געבויעט אויפן שטח הקהילה אויף סוזען דרייוו אין הארץ פונעם עיר התורה והחסידות מאנסי, און דורכאויס די לעצטע פאר חדשים גייט אן די בוי ארבעט אין פולן שוואונג, האלטענדיג שוין נענטער ווי ווייטער צום גליקליכן מאמענט פון חנוכת הבית, ווען די חברי הקהילה וועלן זיך ענדגילטיג אריינציען אינעם נייעם בית המדרש, נאך צוויי יאר זיין איינקוואטירט אין א צייטווייליגע לאקאל.
אצינד איז באשטעטיגט געווארן אז כ"ק אדמו"ר מצאנז שליט"א וועט קומען צו פארן קיין ניו יארק באשיינען די מעמד חנוכת הבית, וואס וועט פארקומען אנהייב וואך פון פרשת בשלח, אינאיינעם מיט א מעמד הכנסת ספר תורה וואס איז געשריבן געווארן דורך די חברי הקהילה. דער רבי שליט"א וועט מופיע זיין בשערי ארה"ב זונטאג פרשת בשלח, און זיך אויפהאלטן דאהי פאר געציילטע טעג, איידערן אהיימפארן לביתו נאוה קודש אין קרית צאנז נתני'.
